Мотоболын ветеранмуд мана эфирт үзүлсн зургудт бийән таньв
Элстин мотобольн команд давсн зун жилин далдгч жилмүдт цуг Советск Союзд ончрад, нер туурж йовсмн. Орн-нутгин болн Европин чемпионатмудт кесг ачлврмуд шүүж авла. Мана программд үзүлсн зургудт спортын ветеранмуд бийән таньв.
Нер туурж йовсн мотобольн командын гешүд мана программд үзүлсн зургт бийән таньв. Эдн ут-тоодан дөчн жилдән нәәжлжәнә. Советск алдр мотоболистнр өдгә цагт чигн чанһ-чиирг болн заглюн. Эдн дару-дарунь нег-негн талан гиичд одад, бүлән күр-күүндвр кенә. Эндр Василий Кравцовин өрк-бүлд энүнә нәәжнрнь Николай Белявцев болн Валерий Кузыченко ирж. Эннь бас учрта. Мана программар үзүлсн далдгч жилин хуучн зургуд үзчкәд, нәәжнр хамдан цуглрхар шиидв. Спортын ветеранмуд тер цагиг тодлж күүндв.
СССР-ин спортын ачта мастер Валерий Кузыченко тодлсар, иим зургудын тускар нәәжнр келж. Тер сән цагиг тодлхд байрта болна. Ода болхла хая-хая харһна. Күн болһн эврә төртә, сул цаг күртхш.
Үүдч Николай Белявцев болхла эднә команд яһж тогтсна тускар тодлхдан дурта. Нег минһн йисн зун жирн дөрвдгч жилд Советск Союзд мотобол шинкн делгрлт авчасмн. СССР-ин спортын ачта мастер Николай Белявцевин келсәр, тер цагт цуг Элст балһсн болн танһч мотоболд дурта билә. Үүдч болж удан наадх гиж санжасн уга. Болв һучн жилдән алдр мотоболын командын ханьд наадв.
Тер цагт Элстин мотобольн командыг Советск Союзд болн Европд йир сәәнәр меддг билә. Эдн далдгч жиләс авн далн йисдгч жил күртл орн-нутгин нәәмн дам чемпион, Европин арвн дам болв. Хальмгин команд кесг жилдән алтн медаляр ачлгдсн билә, Европин кесг орн-нутгудт одад, мана танһчин нер холд туурулсн билә. Шүүж авсн цуг медальмудыг болн кубокмудыг тәвхин төлә Василий Кравцов гертән салу хора йилһж өгв. “Комета” командын хөөннь Автомобилист нер зүүсн командын бичкн музейд спортсменмүдин зүркнд өөрхн экспонатмуд бәәнә. Василий Кравцовин келсәр, иим шлем кесг дәкж зеткрәс гетлж харсж авсмн. Йир сән чинртә хувц билә.
Тер мет мана эфирт үзүлсн хуучн зургудыг танһчин талдан чигн әмтн үзәд, үүмәд бәәв. Иим зургиг Сергей Башанкаевин өөрхн элгн-саднь үзв. Харм төрхд, Сергей Башанкаев сәәһән хәәж. Мотобол хәләжәсн улс дунд эн зургт һарч ирв. Түрүләд Сергейиг дүүнрнь таньв, энүнә өөр зургт нег күүкн йовна. Эннь Сергей Башанкаевин аваль бәәж. Светлана Башанкаеван келсәр, тиигхд хамгин дурта спорт — мотобол бәәсмн. Наадн бол”нд оддг бәәж.
Өдгә цагт Элст балһснд мотобольн команд уга, мотодром чигн үлдсн уга. Ода Әрәсәд иим спортар олн улс соньмсжана. Жил болһн орн-нутгин чемпионат болна. Энүнд “Комета” командын мотоболистнрин сурһульчнр орлцжана. Иргчдән мотобол Хальмг танһчд дәкнәс сергәж босхгдх гиж мотоболын ветеранмуд нәәлжәнә.
Татьяна Дмитриева, Ирчин Алексей
