Медәтнр компьютерн сурһуль дасв

Пенсионермудын төлә компьютерн сурһуль болв. Алдр Диилврин майин йисн өдрин өмн өргнд Хальмгин университетд медәтнрин төлә компьютерар көдлдг эрдмин сурһуль бүрдәгдв. Иим сурһуль өнгәр болв. Шидр сурһулян төгсән медәтнрт сертификатмуд бәрүлж өггдв.

Компьютерн сурһульд медәтнрт олн-зүсн медрл өггдв. Далн тавн наста Клара Куринован келсәр, интернетын дөнгәр олн-зүсн кергтә зәнг болн медрл авч болна. Тегхд Элтс балһснд компьютерн сурһуль секгдснә тускар сонсчкад, удан ухаллго бичгдв. Энүнд искусств бол кино таасгдна. Клара Сергеевнан келсәр, интернатас энүнә тускар олн-зүсн соньн материал авч болна. Тер мет ода медәт электронн пошт олзлдг эрдм дасад авчкв. Медәтә улст эннь йир өвәрц болн соньн болж медгдв гиж эн келнә.

Клара Куринован келсәр, урднь компьютер тал тас өөрдго бәәж. Зуг скайпар ачнр-зеенртәһән күүнддг билә. Ода сурһулин хөөн компьютер эврән олзлдг дасв. Энүнд кесг соньн юм олж авч болна.

Алимпиада Гермашевад сурһуль дасхд амр биш болв. Болв пенсионерк цуг арһ-чидлән агсж көдләд, ода компьютер олзлдг дасв. Иим эв-арһ энүнд эрк биш кергтә. Юнгад гихлә, ода ор һанцхарн бәәнә. Күүкдн болн ачнр-зеенрнь талдан һазрт бәәнә. Ода эднлә онлайн эв-арһар күүндж чаджана.

Алимпида Гермашеван келсәр, ода компьютер көдлгж чадна, энүг эврән унтрана, интернет олзлна. Күүкнь ирхләрн компьютер хулдж өгх. Иим сурһуль бүрдәснд ик ханлта өргжәнә.

Компьютерн сурһульд орх болн интернет олзлх улсин то дегд ик болв. Эднә багд арвн тавн медәт сурчана. Эдн цугтан олн-үзсн көдлмш кеж йовсмн. Сурһулин йовудт авсн медрл эднд иргчдән олз-туста болх гиж эдн тоолжана. Сурһулин йовудт медәтнр цуг кергтә компьюетрн программ болн интернет олзлдг дасж авла.

Хальмгин университетин специалист Гиляна Даржагинован келсәр, медәтнр сурһулян йир даавртаһар сурв, шин медрл авхар зүткв. Ода компьютер мана бәәдл-жирһлд ик чинр зүүжәнә. Нааран ирсн медәтнрт иим сурһуль дасхд күнд болв. Эдн хамгин эгл программ меддго билә. Ода эдн кергтә медрл авсндан байрлжана.

Йириндән медәтә улст компьютер олзлдг эрдм күнд болна. Тер бийнь сурһулин бүрдәһәчнрин келсәр, эрк биш иим эрдм дасж авх дурн диилв. Ода медәтнр нарта-делкәд болжах йовдлмудын тускар сәәнәр медж авч чаджана.

Ээнән Делгр Настан Сергей