Иньглт парк зунын кемд көдлхдән белн

Майин нег шинд Элстин Иньглт паркд бичкдүдин төлә олн-зүсн наадлһна аттракцион көдлмшән эклх. Дулан чилгр өдрмүдт энд олн әмтн бичкдүдтәһән цуглрна. Карусельд болн таллан чигн аттракционд сул цаган давулж, модна сүүдрт элстихн амрхдан дурта. Иим таал паркд бәәнә. Хамгин икәр бичкн көвүд-күүкд аттракционд дурлна. Энүнәс иштә карусельд әәмшг угаһар дошх төр хамгин ик чинртә төрт хүвржәнә.

Элст балһсна бәәрн әмтн Владимир болн Юлия Питаевихн тогтсн зангшалар майин байрин өдрмүдиг Иньглт паркд давулх саната. Өрк-бүләрн сәәнәр амрхд энд цуг таал бәәнә гиж эдн тоолжана. Зуг энд көдлжәх аттракционмуд әәмшгтә болж медгдв. Владимир Питаевин келсәр, карусель таасгдна. Бичкдүд дала. Энд эднлә наадж болх. Амрхин төлә сән һазр. Зуг карусельд дошхд әәмшгтә.

Паркин көдләчнрин келсәр, ода цуг карусельмудыг эврәннь чидләрн хәләж ясх кергтә болжана. Энүнә төлә мөнгн йилһж өггджәхш. Энд бәәх аттракциона ик зунь кесг жилдән көдлжәнә. Эдниг "Диамед" нертә Московск областин шишлнг лабораторин специалистнр шинжлж хәләв чигн, эдн әәмшг учражана.

Паркин директор Кермн Васильеван келсәр, амрлһна парк шин сезонд белн болв. Энд бәәх цуг техник әәмшг уга көдлх кемжәнд ирлцжәнә. Иньглт паркин директор Кермн Васильеван келсәр, сезонд белдвр урдк жилмүдлә әдл кегдв. Цуг аттракцион белн, эдниг ширдәд кеерүлв. Шалзас хорн цацгдв. Цуг белдврин көдлмш темдглсн зураһар кегдв. Жил болһн цуг техник шинжлж хәләгднә, кергтә кемжәнд ирлцжәнә. Эндр өдрт парк көдлмшт белн болв.

Тер мет ода паркд әмтнә эрүл-мендин халхд дәкәд нег әәмшгтә тоотнь —шалз. Хальдврта болн әәмшгтә хортнас улсиг харсхин төлә өндр өвсиг паркд болн балһснд хадж унһана. Талдан урһмлд шишлнг хор цацна. Иим керг-үүлдвр күцәв чигн, паркд болн йиртмжд һархларн болһамжта бәәтн гиж Роспотребнадзорин специалистнр саглулжана. Зәрм әмтн байрин өдрмүдт теегт һарч амрна.

Роспотребнадзорин әнгин ахлач Сергей Савченко келсәр, Иньглт паркд шалз илтклһнә шинжлт кегдсн уга. Элст балһсна аһуд болн эргндк аһуд шалзин то әәмшгтә кемжәнәс давад уга. Тер бийнь саг бәәх кергтә.

Иньглт паркд байрин өдрмүдт олна диг-дара полицин көдләчнр харж хәләхмн. Олн улс орлцата керг-үүлдвр давулһнас иштә МВД-н көдләчнр чанһ диг-дарана церглтин кемжәнд бәәнә.

Олна һазрт бийән дигтә-даратаһар бәрх неквриг әмтн эврән күцәх зөвтә. Нааран ирсн улс биүән болн бичкдүдән эврән хәләж бүрткх зөвтә.

Елена Алексенко, Бадмаран Владислав