6 марта 2014, 15:08
Машидын зогсалын төр хурц болжана
Машидын зогсалын төр ода ик балһсдын биш, бичкн балһсдын хурц төр болжана. Автомобильмуд зогсагдг һазр уга болад цүүгән һарчана. Хаалһин хажуд кесг дуунад машид зогсна, экологическ бәәдл муурна, газонмуд эвдрнә болн талдан чигн дуту-дундс һарчана. Элст балһснд иим бәәдл хотл балһсна цутхлнгд болн әмтн бәәдг гермүдин өөр тогтв. Зәрмдән автомобильмудыг жолачнр подьездин өөр зогсана, әмтн йовдг хаалһ эзлнә, бичкдүдин плошадкст машиһан үлдәнә. Гермүдин эздүдиг иим бәәдл үүмүлжәнә. Олн машид герин өөр зогсад, йовдг арһ уга, бичкдүдт наадх һазр үлдсн уга, бачм чинртә йовдл учрхла медицинск дөн күргдг машид орж чаджахш гиж гермүдин эздүд зәнглжәнә. Шишлнг машидын зогсал уга гиж жолачнр гөрдж һарна.
