Мана сурһульчнр цугәрәсән президентск спортын марһанд орлцх
Хальмгин сурһульчнр цугәрәсән президентск спортын марһанд орлцх. Городовиковск дундын школын көвүд-күүкд мана танһчин нер Анапа балһснд харсхмн. Энүнд Әрәсән хамгин сән гисн школмудын командс цуглрх. Тегәд чигн Городовиковск балһсна баһ наста спортсменмүд ик белдвр кежәнә. Дөрлдән хойр долан хонг болад эклх.
Сурһульчнрин шүүж авсн ачлврмуд эн школд спортд баһчуд дурта болдгин герч болжана. Көвүд-күүкд ода футбол, баскетболд дурлсн деерән, талдан чигн спортд дурта. Тер тоод гимнастикин болн гиигн атлетикин спорт эдн таасжана. Элст балһснд май сард болсн Прзеидентск марһанд городовиковцнр эн спортан товчлгч дөрлдәнд чидлән сөрсн билә. Аштнь эдн диилвр бәрв. Городовиковск балһсна һурвдгч школын доладгч а классин сурһульч Алина Сироткина келсәр, бүкл жилдән марһанд белдвр кеж. Тер тоод района болн танһчин дөрлдәнд орлцхар белдв. Тренер ик дөн болв. Тегәд чигн эдн диилвр бәрж чадв. Городовиковск балһсна һурвдгч школын доладгч а классин сурһульч Владислав Игнатенко келсәр, дөрлдән күнд болв. Элст балһснд диилвр бәрхлә, Анапа балһсд одх арһ бәәнә гиж тренер оньдин келдг билә. Тегәд чигн диилвр бәрхәр чидлән әрвлсн уга.
Городовиковск дундын школын доладгч а класс Әрәсән хамгин сән гисн спортын классын марһанд орлцх. Келхд, эдн президентск дөрлдәнә танһчин девснгд диилвр бәрсн билә. Ода көвүд-күүкд белдврин көдлмш кежәнә. Марһан Анапа балһснд августын хөрн нәәмнд болх. Тенд болх марһасин йовудт сурһульчнр чанһ-чииргән, чидлән болн теслтән үзүлх зөвтә. Көвүд-күүкдин келсәр, иим дөрлдән баһ олимпийск нааднла әдл болхмн. Алина Сироткина келсәр, түрүн болж иим ик чинртә марһанд орлцх. Тенд Олимпиадла әдл марһан болх. Сән белдвр келәвидн гиж эн келнә. Владислав Игнатенко темдглсәр, олимпийск чемпиона нер зүүхд ода чигн эрт. Зуг өсхләрн Олимпийск наадн Әрәсән нер харсх санан бәәнә.
Элст балһснд диилвр бәрсн байриг сурһульчнрин эк-эцкнрнь бас хувалцв. Эднә нилчәр көвүд-күүкд шин спортын хувцта болх. Удл уга иим хувц эдн өмсх. Цугәрәсән спортын марһанд орлх бичкдүдин хувц бас сән болх зөвтә. Физкультурин багш Юрий Сафроновин келсәр, спортын хувцн гиж майк, трусик орна, бейсболк өмсх, майкд Хальмг танһч гисн үгмүд бичгдх, өрчднь бадм цецг зургдхмн.
Президентск марһан ямаран аштаһар төгссн бийнь, Юрий Сафроновин тоолврар, хальмгин сурһульчнр товчлгч дөрлдәнд орлцснь бас күндтә нерн болжана. Тер саамд школд хаһлх төрмүд ода чигн дала. Сурһулин шин жил эклхин өмн спортын зал болн стадион шинрүлж ясх төр тәвгджәнә. Дәкәд болхла спортын шин инвентарь хулдж авхла сән болх. Эннь хамгин һол керг. Энүнә төлә мөнгн йилһж өггдәд уга гиж Юрий Сафронов келнә.
Чучян Валентина, Ирчин Алексей
