Махна мал өсклһнә халхар шинжлт кедг номтнр Хальмгин малчнрт дөн болжана

Махна мал өсклһнә номин шинжлтын цугәрәсән институтын номтнр Хальмгин малчнрт сән дөн болжана. Хальмг танһчин селәнә эдл-ахун министерствин үрврәр хальмг тохма мал өскдг эдл-ахусин келн-улсин ниицәнә программар мана танһчд селәнә эдл-ахун номин доктор Киниспай Джуламанов ирв. Келхд, хальмг тохма мал өсклһнә келн-улсин ниицән эн жилин май сард бүрдәгдв. Әрәсән нертә номтнр хальмгин малчнрт ямаран дөн күрггджәхин тускар мана зәнгч Ээнэн Ольга келжәнә.

Специалистнрин келсәр, жил болһн бонитировк кеһәд, тохма мал өскдг эдл-ахус өскжәсн малан шинжлж үнлх зөвтә. Тохма бод малыг тохмарн унгарнь, цогц-махмударнь болн талдан чигн чинрәр шинжлж хәләнә. Бод мал ямаран төль өгхинь медж авх кергтә. Селәнә эдл-ахун номин доктор Киниспай Джуламанов эн өдрмүдт Целинн района тохма мал өскдг нег эдл-ахуд дамшлтарн хувалцж, кергтә дөн күргжәнә. СНХ Тохма мал өскдг ах зоотехник Роман Сангаджиевин келсәр, өдгә цагт бидн бод малын сүргин үкрмүдиг шинжлж хәләжәнәивдн. Хальмгин тохма малын ниицәнлә күцәжәх нөкцлтин программар мана эдл-ахуд номт, махан мал өсклһнә цугәрәсән институтын профессор ирәд, бонитировк келһнд нөкд болжана. Иим кевәр мал ямаран төль өгхинь болн олн-зүсн халхар чинринь медж авнавидн.

Хальмг танһчин селәнә эдл-ахун министерствин то-дигәр, сүл арвн жилд тохма малын то мана регионд хйор холванд икдәд, жирн долан минһнд күрв. Ода мана танһчд долан племзавод болн һүчн племрепродуктор көдлжәнә. Эдн эврәннь көдлмштән сүл цагт номин халхар бәрсн күцәмж олзлжана. СНХ Селәнә эдл-ахун номин доктор Киниспай Джуламановин келсәр, хальмгин тохма мал өскдг эдл-ахусин специалистнр махна мал өсклһнә цугәрәсән институтын улд Оренбург балһснд сурһуль дасв. Институтын номтнр болхла ниицәнә көдлмшин программар эдл-ахусд одад, дор ормднь дөн күргжәнә. Сурһуль дассн хөөн специалистнр эдл-ахусдан дамшлтан өөдлүлх зөвтә.

Хальмг тохма мал өксдг келн-улсин ниичәнә көдлмшин программар махна мал өсклһнә цугәрәсән институтын номтнр ода Целинн района хойр племрепродукторт сән дөн күргжәнә. Удл уга иим көдлмш талдан чигн эдл-ахусд күцәгдх. СНХ Селәнә эдл-ахун номин доктор Киниспай Джуламановин келсәр, тохма мал өскдг эдл-ахусд иим ик чинртә болн гүн көдлмш сән ашта болх. Эн көдлмшин ашт хальмгт тохма мал сән чинртә болх, бат, чанһ-чиирг төль өгх зөвтә.

Давсн жилд мана танһчд махна мал өсклһнә халх дөннлһнә батлһа санг тогтагдв. Ода цуг тохма малын туск шинжлт нег электронн то-дигд орулгдх. Тохма малмуд шишлнг чипта болх. Цуг эн көдлмш хальмг тохма малын чинринь ясмрулж, сән чинртә үкрә мах һарһлһнд туслх.