Лаганя заһсчнр цаглань тенгст һарч чадсн уга
Хаврар заһс бәрлһнә көдлмш цаглань эклсн уга. Мартын нег шинд Лаганск района зәрм заһсчнр тенгст һарч чадсн уга. Эннь бас учрта. Ода заһс бәрдг бригадмуд тенгст һархин өмн Әәдрхн балһснд ирлцнһү зөвшәл авх зөвтә. Энүнә төлә хол балһснд күрх кергтә, документ һарч авхин төлә бас цаг кергтә болна.
Кермсин государственн регистрацин тускар федеральн заканд сольвр орулгдснас иштә ода баһ кемжәтә кермс Лаганя тооһас һарад, Әәдрхн балһсна тенгсин регистрт темдглж бичгдх зөвтә. Специалистнрин келсәр, цуг документ бүкл февраль сарин эргцд кегдв. Тегәд чигн зәрм заһс бәрдг бригадмуд тенгст һарч заһс бәрж чадсн уга. Иим кемд сән күцәмж бәрхин төлә олн-зүсн таал кергтә, тер тоод тенгрин бәәдл, заһсна көрнг болн күүнә учр тоод авгдна. Юнгад гихлә, заһсчнр бачм чинртә бәәдлд көдлнә.
Лаганск района АПК-н делгрлтин әнгин ахлач Александр Малышевин келсәр, ода нег чигн цувгд усн уга. Заһсчнр эврәннь гөлмән хәләхәр ирнә, зуг усн уга болж одна. Эдн һазр деер йовна. Астраханск областьд болн Дагестанд ии бәәдл уга. Тенд альд болв чигн заһс бәрж болх.
Тер мет тенгст усна кемжән баһ болхла эннь заһс бәрлһнд бас боомтг болна. Тегәд арһ уга иим бичкн уснас көлтә онцһиг иим таалд ирлцүлх кергтә болв. Хаврар заһс бәрлһн шинкн эклв. Тегәд көдләчнр хойр минһн дундур тонн заһс бәрж авх арһ бәәнә. Эннь давсн жиллә дүнцүлхлә, хойр зун тәвн тоннд ик болжана. Хойр минһн йисдгч жиләс авн гүлмд бекр заһсн бичгә тортха гиһәд, гелм олзлһна кежмән баһрв. Ода зуг тенгсин көвәһәс нег дуунад заһс бәрж болх. Тер мет Каспийск номин шинжлһнә институтын филиал уга болад, заһс бәрдг улст харшлт болжана. Энүнә тускар лаганцнр танһчин премьер-министр Игорь Зотовд келж өгв.
Хөрн долан заһсчнрт көдлх зөвшәл өгләвидн. Хөрн нәәмнд эдн тенгст һарч йовхар седв, зуг пограничникүд зөв өгсн уга. Мартын нег шинд һартн гиж. Лаганск района администрацин ахлач Андрей Манджиевин келсәр, урднь эн туст нег организац билә, ода болхла эднә то ик.
Эндр болн өөрхн иргчд заһсна жирмәхә эс өскхлә заһсна эдл-аху делгрүлж болшго гиж района администрацин толһач Андрей Манджиев келнә. Энүнә төлә хойр минһн нәәмдгч жилд заһсна жирмәхә өскдг комплексин тосхлт эклсн билә. Болв мөнгн уга болад эн тохслт кегджәхш. Энүнд зуг арвн нәәмн сай арслнг олзлж чадв. Тер саамд заһсчнр заһс бәрхин төлә тенгст һарч чаджахш.
Премьер Игорь Зотовин келсәр, лаганск районд Росрыболовстин әнг тогтах кергтә. Эн туст дөн болхвидн. Цувн хаажах дамбиг уга кех кергтә. Тер мет мөнгнә дөн күргх зура бәәнә.
Искусственн кевәр жирмәхә өсклһнә питомник көдлхлә, мана танһч кесг минһн тонн сән чинртә немр продукц авч чаджана. Эн төр хаһлхин төлә Игорь Зотов эврәннь ухан-тоолврарн хувалцж, олз-туста селвг орулж өгв.
Ээнән Ольга, Бадмаран Владислав
