Лаганск района больницд шин оборудовань углж тәвгджәнә

Хальмг танһчд эрүл-менд харлһан халх шинрүлһнә программ цаарандан күцәгджәнә. Энүнә төлә федеральн бюджетас нег сай долан зун минһн арслнг ирв, һурвн зун сай арслнг танһчин хазнас йилһж өггдв. Ода эмнүлин учрежденьст ясврин көдлмш кегджәнә, шин оборудовань хулдж авгдв.

Эрүл-менд халх шинрүлһнә көдлмш мана танһчд сән йовудтаһар күцәгджәнә. Эрүл-мендин халх күн болһна бәәдл-жирһлин чинр өөдлүлһнә ул болжахин тускар Хальмг танһчин цуг улс ил медв. Лаганск районд цутхлнг больницд шинрүлж яслһна көдлмш гүргүдән.

Лаганск района цутхлнг больницин ах эмчин дарук Ирина Иванован келсәр, эрүл-менд харлһна халх шинрүлһнә программар больницд шин оборудовань ирв. Рентген кабинет шин аппаратмуд бәәнә. Компьютерн томограф ирв. Района әмтн байрта бәәнә. Талдан һазрт одлго кергтә туслжм авч болх.

Эмч рентгенолог Гюльнара Акужаева энд долан жилдән көдлжәнә. Эрүл-менд халх шинрүлһнә көдлмшин ашиг өдр болһн эврәннь көдлмштән үзнә.

Эмч рентгенолог Гюльнара Акужаеван келсәр, рентген кабинет ода чигн секгдәд уга. Кергтә документ күләжәнә. Энүг авхла кабинет секж болх. Эн долан хонгт специалистнрин төлә шишлнг сурһуль болв.

Өдгә цагт района больницд компьютерн томограф көдлмшт белдгджәнә. Энүнд көдлх цуг специалистнр шишлнг сурһуль дасв. Уд луга шин өдгә цагин некрвлә ирлцәтә оборудовань экләд көдлх. Тиигхлә района бәәрн әмтн холл һазрт одлго дор ормдан томографическ шинжлтд орж чадхмн.

Лагань балһсна бәәрн күн Гауден Гуспановин келсәр, урднь Әәдрхн эс гиж Элст балһснд одх кергтә бәәсмн. Ода болхла йир сән болв, дор ормдан шинжлтд орж болх. Эврә томограф бәәснь йир сән керг болжана.

Района эрүл-менд харлһна халх шинрүлһнә туст күцәгджәх керг-үүлдврмүд лаганя эмчнрин көдлмшт сән нилчән күргж, медицинск туслжм күрглһнә чинр өөдлүлжәнә.

Харлун Бадма, Хулхачин Николай