Хальмгин театр Новгород балһснд болсн фестивальд орлцв

Баснга Баатрин нертә келн-улсин Хальмгин театрин артистнр Театральное вече нертә тавдгч нарта-делкән фестивальд орлцад, хәрж ирв. Новгород балһснд эдн Әрәсән болн Хальмг танһчин искусствин ачта үүлдәч Борис Манджиевин тәвсн Кровавый трон наад хальмг келәр үзүлв.

Эн видеозургудыг келн-улсин драматическ театрин артистнр цокж авч. Кровавый трон нааднд йоста туужин йовдлын тускар келгджәнә. Хальмг танһчин сойлын ачта көдләч Галина Шураеван келсәр, һаза тәвсн наадн байрин программла йир сәәнәр ирлцв. Олар цуглрсн хәләһәчнрин оньгт тавн наадн тусхагдв.

Хальмгин сойлын ачта көдләч Галина Шураеван келсәр, дәкәд нег нааран иртн гиж хәләһәчнр болһн келв. Театрин үзүлсн наадн цуг улст таасгдв. Иим фестивальмуд театрт кергтә. актермуд таладн һазрин хәләһәнрин өмн онц даавртаһар наадна. Талын һазрт эврәннь театран элчлсн деерән бүкл танһчин нер харсв.

Театральное вече нертә фестивалин һол төрнь туужин төр болв. Режиссер иим наад шүүж авснь бас учрта. Энүнд дәәнә цагин нег ханствин туужин тускар келгджәнә. Кровавый трон нааднд Менкә хан дәәнәс диилвр бәрәд хортна гергтә болн эднә көвүтә хәрж ирнә. Дуран өгнс хан гергнд хатна цол зүүлһнә. Болв эн шиидвриг хаана өөрхн улс дөннжәхш. Удл уга Намжл хатн хаанд ширәд суух көвү һарһна. Дарани дәәнд одад хан әмнәсн хаһцна. Көвүнәннь ормжд ханствин һардвриг хатн эврәннь һартан авна. Хатн һардсн кемд ханствин дотр цүүгән-зүткән болна, хатна һардвр олн әмтнд таасгдхш. Ханств тарад унхинь медчкәд, хатн зака эвдж ширәд эврәннь ууһн көвүһән суулһна. Энүнәс көлтә дән-цүүглдән улм күч авна. Хатна отхн көвүнь иим шиидврлә зөвшәрлго, экдән болн шин хаанд дә босхна. Наадн хальмг келәр үзүлгдсн бийнь, хальмг улсин туужин тускар медж авх улс олра цуглрв.

Шин театральн сезонд артистнр соньн шин наад болн көгжмин композиц белджәнә. Тер мет тетарин коллектвив Уильям Шекспирин нег наад үзүлх зурата.

Ээнән Делгр, Бадмаран Владислав