Көтчнрә района селәнә хойр школд эн намрар газ ирх
Танһчин школмуд сентябрин нег шинд сурһульчнриг тосж авхар белджәнә. Ода эрдм-сурһулин цуг учрежденьст ясврин көдлмш гүргүдән. Тер тоод иим көдлмш Көтчнрә районд бас кегджәнә. Урднь эн районд тавн школд беш түләд дула өгдг бәәсмн. Эн жил Ергенинск болн Һашун Бурһст селәдин школмудт газ орулгдх. Энд ода ясврин көдлмшиг багшнр болн эк-эцкнр хамдан кежәнә. Эн намрас авн Һашун Бурһст селәнә хөрн дөрвн сурһульч сарул дулан герт сурхмн.
һаха сарин нег шин күртл һурвн долан хонг үлдв.Тегәд эн өдрмүдт цуг танһчин балһсна школмудт ясврин көдлмш кегджәнә. һашун бурһуста селәнә школын багшнр өрүн цагасн авн асхн күртл школдан ирәд ясврин көдлмшән кежәнә.
Сурһульчнрт халун хот чандг замч Валентина эн өдрмүдт тосхач болв, эдн күнд көдлмшәс әәлго күнд чигн көдлмш кенә. Школын хуучн поолыг багшнр хамхлад нүкмүднь ясад шин линолеум делгх саната.
Эн өдрмүдт школын багшнрт селәнә улс дөн нөкдән күргжәнә. Тер юнгад кесг жилдән эн школд ясвр кегдсн уга билә, дәкәд сурһулин жил эклтл цөн өдрмүд үлдв. Селәнә залус күнд көдлмш кежәнә, күүкд улс болхла эрс ширдәд, хог бог хурана. Һашун бургуст селәнә бәәрн күүкд күүнә Оргадыка Кермнә келсәр цуг эн көдлмш сурһульчнрин төлә кегджәнә. Цевр сарул классмудт сурһуль сурхд йир амр болх. Үвлин цагт классин хорас дулан болх зөвтә.
Баһ наста директорин келсәр дөрвн жилдән селәнә сурһульчнр хуучн баракд сурһуль сурсн билә. Үвлин кемд тенд дангин киитн билә. Бичкдүд киитн классмудт суулгон дангин сурһуләсн дутдг бәәсмн.Эн өдрмүдт школд дөрвн зун метр турвас, котельнә хәәсн сольгдв. Ясврин хөөн энүнд йир дулан болх Селәнә школд хөрн дөрвн сурһульч медрл авх. һашун бургст селәнә школын директорин дарук Мангута Муутлн келсәр селәнә әмтн ирәд өдр сө уга, дөн нөкдән күргжәнә. Хамдан ни негн кевәр ясврин көдлмш кехлә манна селәнә сурһульчнр цаглань школд орх зөвтә гиж директорин дарук келв. Эн сурһулин жил эклтл һурвн долан хонг үлдв эн өдрмүдт шинкән школд орхар седжәх зурһан долан наста көвүд күүкд төрскн энкр селәнә школдан ирәд ясврин көдлмш цаглан кегдх аль угай бүртлһ Кежәнә гиж школын багшнр инәдж келжәнә.
