Комсомольский селәнә әмтн удл уга сән чинртә уста болх
Хар Һазра района цутхлнг Комсомольский поселкин әмтн удл уга сән чинртә уудг усар теткгдхмн. Селәнә социальн делгрлт нертә федеральн программар энд усна шин сурвлжн тосхгджана. Келхд, уудг усна төр селәнә улсиг ик кезәнәс авн үүмүлжәсмн. Хальмг танһчин талдан чигн райодын әмтн бас эн халхар түржәнә.
Эн жилин июль сард бәәрн района муниципалитет Комсомольский селәнд усна сурвлжна ясвр кехин тускар тосхлтын организацла бооца батлж авсн билә. Тер бийнь ода эн көдлмш энд гүргүдән. Эн өдрмүдт усна сурвлжн татгджана, бүртклһнә худгуд кегджәнә.
Мастер-бригадир Николай Адучиевин келсәр, Ленина нертә уульнцар усна сурвлжн татгдв. Тенд зун жирн мииллиметрта турва тәвгдв, Некрасовин нертә уульнцд болхла зун миллиметр турва бәәнә. Селәнә захд Строительная, Газовая болн Пушкина нертә уульнцд көдлмш кегджәнә. Ода һурвн уульнц белн. Энд долан күн көдлжәнә, дөрвн шишлнг техник бәәнә.
Ода селәнә цуг әмтн сән чинртә уудг ус тенкән уга гидгәр күләжәнә. Комсомольский поселкин улсин гермүдт нурһлж усна сурвлжн бәәсн бийнь, уудг усна чинрнь ода му. Усна шин сурвлж татхла, ус цеврлдг сооружень бәрхлә, Комсомольский селәнә улсин бәәдл-жирһл ясрх зөвтә. Дегд ик байр болв. Усн ирхлә цуг төр хаһлгдх. Иим керг йир сән. Усар тетклһнә төр ик кезәнәс авн хурц төр болжана. Эн төр танһчин талдан райодын улсиг бас үүмүлжәнә.
Усна сурвлж шинрүлж тосхлһна муниципальн бооцаһар иим көдлмш кехин төлә хөрн негн сай арслнг кергтә. Хальмг танһчин бюджетас тавн сай хойр зун минһн арслнг йилж өггдв, бәәрн района хазнас болхла күсдундур сай арлснг ирв. Эн өдрт тосхачнр һурвн сай арслнг федеральн мөнг олзлв. Района администрацин толһачин дарук, Хар Һазра РМО-н аппаратын һардач Санл Мукабеновин келсәр, тосхлтын хойрдгч девснгнь иргч жилд кегдх. Апрель сарс авн октбрь сар күртл селәнә цуг уульнцд иим көдлмш кегдх. Тер мет усна цамхаг болн талдан чигн сооруженьс кегдв. Ода бәәх усна сурвлжн хуучрв. Тер бийнь көдлжәнә. Болв герт болһн шин усна сурвлж татх зур бәәнә. Энүнә төлә бәәрн әмтн бүрклһнә худг, тооцана прибор углж тәвх зөвтә. Дәкәд болхла әмтн коммунальн туслжмин өрән данцах неквр бәәнә гиж Мукабенов келнә.
Удл уга Хар һазра района цутхлнг Комсомольский селәнә әмтн сән чинртә уудг уста болх. Болв ода Хальмг танһчд уудг усн уга олн селәд поселкс бәәнә. Эн туст селәнә социальн делгрлт нертә болн цевр усн гидг федеральн программ сән нилчән күргх зөвтә.
Бевина Мергн, Хулхачин Николай
