Көтчнрә района Көглт селәнд болсн мөрнә урлданд дииләч маши шүүж авв
Көтчнрә района Көглт селәнд мөрнә урлдан болн спортын байр болв. Иим дөрлдән селәнә эдл-ахун көдләчнрин сән өдрт нерәдгдв. Мөрнә урлдана орлцачнр марһана һол мөрән төлә “Toyota Rav 4” нертә автомобиль шүүж авхар зүткж урлдв. Тер мет бәәрн әмтн болн олн гиичнр соньн концерт хәләв.
Мөрнә урлданд кен диилв бәрхнь әмтн оньган өгч хәләв. һучн дуунад арвн тавн мөр урлдачнр орлцв. Дөчн минутн эргцд мөрән, бийән әврүлго эдн урлдв. Зүткәтә мөрнә урлдана ашт арвн хойр нас зүүсн жокей Саламат Айткаев түрүн орм эзлв.
Арвн хойр наста Саламат көвүн юмнас әәлгон, бөдүн залусла мөрнә урлданд орлцв. Түрүн орм эзлсн көвүн өөрхн элгн саднлдан ик байр үүдәв. Аавнь Алюшкин Анатолий тенкән уга байрта бәәнә. Бичкн көвүн Саламат “Toyota Rav 4” гиигн маши шүүж авб.
Анатолий Алюшкиев бичкн цагасн авн мөрд асрна. Болв түрүн болж гиигн маши авб. Волга нертә мөрн гиигн маши энүнд авч ирлә гиж Анатолий байрлад келв. Өдр болһн бидн тренерла көдлвидн гиж Анатолий маднд келв.
Селәнә эдл ахун көдләчнрт нерәдгдсн байр олн улсиг негдүлв. Ик бичкн уга эн нәәрт орлад цаган соньн кевәр давулв. Малын ард йовдг улсин көдлмш әвр күнд, үвлин киитнд зуна һан халунд эдн көдлнә.
Дигтә эн өдр олн жилдән селәнд көдлж йовх улсан Көтчнрә района һардвр мөнгнә белгүдәр болн күндллһнә һашгудар йөрәв. Келхд, эн жилд көчнрәхн киитн үвләс һан халунас гем угаһар малмудан хәләһәд һарв. Ик байрла селәнә эдл ахун көдләчнрт хальмгин толһач Алексей Орлов бүлән үгән келж йөрәһәд цаһан хаалһ эрүл менд дурдв.
Хальмг Танһчин билгтә артистнрин үзүлсн концерт ик бичкн угад таасгдв. Эдн ормдан зогслго дууһан дууһан дууулад бииһән бииләд байрлцхав. Мөрнә урлдана хөөн лотерей болв энүнд бас хойр гиигн маши шүүгдсн билә. Селәнә эдл ахун көдләчнрт нерәдгдсн байр олн улст удандан мартгдшго.
Аджин Светлана, Николай Хулхачин
