“Динамо” команд Хальмгин чемпиона нер зүүв
Хальмг танһчин футбольн чемпионатын ашар “Динамо” ОВО МВД команд түрүн орм эзләд, алтн медаль шүүж авв. Эн жилин марһанд арвн дөрвн команд орлцв. Товчглгч нааднд динамовцнр иим түрнирт түрүн болж орлцсн “Най-Ин” командыг диилв. Наадн йир зүткәтә болв. Харһлтын чилгч күртл нег чигн команд гол цокж орулж чадсн уга. Зуг наадна немр болзгт нег гол цокж орулгв. Элстин хойр команд хәм наадад, аштнь пенальти цокх кергтә болх гиж футболд дурта улс таавр кежәлә. Болв “Динамо” 1:0 тооһар диилвр бәрв. Һурвдгч орм Комсомольский селәнә “Лотос” команд эзлв. Эдн танһчин спортын бичкдүдин школын футболистнриг шүүв. Соньн болн зүткәтә харһлтс Сити-Чессин стадионд болв. Товчлгч наадд Хальмг танһчин толһач Алексей Орлов ирж хәләв. Энүнә келсәр, Хальмг танһчд профессиональн футбол дәкнәс сергәж босхж авх кергтә. Чемпионатын хамгин сән футболистын нер "Динамо" командын элч Чингиз Сангаджиев зүүв. Эднә тренер Сергей Пода марһанд сән аш бәрснд байрлв. Ноябрь сард Хальмг танһчин чемпион Азов балһснд болх Өмн үзгин федеральн округин чемпионмудын кубок шүүж авхар дөрлдх. Ода болхла эдн танһчин мотоболын ветеранмудас үлгүр авч чаджана. Эн өдр стадионд Европин болн СССР-ин кесг дам призермудыг байрин бәәдлд йөрәв. Танһчин толһач Алексей Орловин зәрлгәр, спортын ачта мастермуд, “Комета-Автомобилист” алдр командын гешүд Николай Белявцевд болн Валерий Кузыченкод Хальмг танһчин күндтә гражданин нерн зүүлһгдв.
