Көтчнрә района Алцынһуд селәнд шин больниц секгдв
Көтчнрә района Алцынһуд селәнд хойр жил хооран шин больниц секгдв. У сарул, дулан хорас, бийән уһадг хора, киитн болн халун чигн усн бәәнә. Цуг эн тоот “Селәнә социальн делгрлт” нертә федеральн программар кегдсн билә. Зуг эндр өдр күртл шин медицинск оборудовань углж тәвсн уга.
Алцынһудын шин больниц «Селәнә социальн делгрлт» нертә федеральн программар 2010гч жилд тогсхгдсн билә. Эмч болн хойр медсестрас эндр минһн шаху бәәрн улст дөнгән күргжәнә. Ода өдрин стационар көдлжәнә, удл уга аптек күцц кевәр көдлхмн. Энүнә тускар урднь чигн санжасн угавидн гиж селәнә әмтн келнә.
Алцынһуд селәнә бәәрн күн Кермен Муткаеван келсәр, эмчнр кергтә цагла тер дарунь эмнүлһ өгчәнә. Шидр шин аптек секгдв. Ода энүнд эм хулд авч болжана. Хамгин түрүнд күүнә эрүл-менд батрулһн болжана.
Алцынһуд селәнд ода газ бәәнә, школд болн бичкдүдин садт ясвр кегдсн бәәнә, клуб чигн көдлнә. Цуг эн тоот бәәрн йосна болн селәнә эдл-ахун предприятин нилчәр кегдсн бболж һарв. Келхд, Көтчнрә районд нилхүд төрһ һарһлһна туст эн селән нүүрт йовна. Экнр болхла, мөнгнә дөн күрггднә.
Араши Чапчаевин нертә племзаводын ахлач Иван Эрендженовин келсәр, цуг селәнә төрмүд ода хаһлгджана. Келхд, давсн жилд баһ наста өрк-бүлдмүдин төлә селәнд 4 гер тосхгдсн билә, тегәд нәәмн өрк-бүл бәәдг герәр теткгдв. Эн жил болхла дәкәд 4 өрк-бүл шин герт нүүж орхмн.
Бәәрн улсин диспансеризац, урдаснь гем илтклһн, шишлн специалистнрт бийән үзүлж консультац авлһн — селәнә эмчнрин һол керг болжана. Зуг энүнә төлә шишлн медицинск оборудовань кергтә гиж эрүл-мендин көдләчнр келжәнә. Тегәд Алцынһудын больницин эмчнр шин техник ирх гиж нәәлжәнә.
Алцынһудын больницин эмч Галина Нусхаеван келсәр, шин гер тосхгдсн болв чигн, энд өдгә цагин енктврлә ирлцәтә оборудовань болн өлг-эд уга болжана.
Балһсна больницмүд эрк биш даатлһна медицинск сангас болн цуг кемжәнә бюджетас мөнгәр теткгдг болхла селәнә эмнүлин учрежеденьс бәәрн хазнгас невчк мөнгн йилһж өггднә. Тегәд үнтә медоборудованяр энд үүлджәх энгүдиг теткдг арһ уга болжана.
Бевина Мерген, Хулхачин Николай
