Ирина Дорджиева ке-сәәхнәр кегдлмүд кенә

Ирина Дорджиева ке-сәәхнәр кегдлмүд кенә. Келхд, хаврин кемлә күүкд улс олар кеерүлһн өмснә. Эврә һарар кесн кегдлмүд хамгин сәәхн болж медгднә гиж мана сюжетин һол дүр санжана.

«Мөнгнә модн», «Сакура» болн нань талдан зу һар кегдлмүд Ирина Доржиеван болн энүнә өөрхн элгн-саднаннь гер кеерүлжәнә. Энүнә кесн кегдлмүд олн-зүсн өнгтә.

Эн хар мод Иринан түрүн кеж һарһсн кегдл болжана. Келхд, энүг күүкн 4 өдрин туршарт кесмн. Эн соньн эрдмәр Доржиева жил хооран соньмсв. Элгн-саднь дангин энүг дөнгннә. Ирина бичкн цагас авн юм уяд, хатхмр кедг бәәсмн.

Ирина Доржиеван келсәр, сул цаг бәәхлә, хара сууж чаджахш. Бисерин эв-арһ энүнд дурта эрдм болсн деерән, чеежин сергмж болжана.

Иринан тоолврар, эн эрдм йир жанһрта. Үлгүрлхд, нег мод кехин төлә олн-зүсн өнгтә бисер, гипс, декоративн чолун болн элсн кергтә. Нег мод тогтахин төлә тиим зу һар бүчр кергтә болна. Эн эрдм Иринан үр күүкн Елена бас соньмсч дасчана.

Елена Митенован келсәр, эн эрдм йир соньн. Би тиим ке-сәәхн кегдлмүд кехәр зүткжәнәв.

Эн эрдм олз-тус күргнә гиж Ирина тоолжана. Ода болхла билгтә күүкд күн «Бансай» нертә модыг кеерүлжәнә. Ямаран болхнь көдлмшин йовудт медгдх гиж эн келнә.

Ээнән Дельгр, Бадмаран Владислав