Көлгн-күчнд әәмшг уга бәәдл теткх кергтә
Көлгн-күчнд әәмшг уга бәәдл тетклһнә төлә государств кесг жува арслнг йилһж өгх. Эн төр давсн жилин чилгчәр Волгоград балһснд учрсн терактмудын хөөн ик чинр зүүжәнә. Энүнәс иштә давсн жилд төгссн федеральн шишлнг программ шинәс күцәх даалһвр дотр-дундын кергүдин министерствд Әрәсән правительствин ахлач Дмитрий Медведев өгв. Энүнә төсв удл уга батлж авгдх.
Галина Пескова хотл балһсна нег ик магазина хулд-гүүлгәнә элч. Көдлмшин кергәр долан хонг болһн Волгоград балһснас Элст балһснд йовна. Элстин автовокзалд әәмшг уга бәәлһнә халхар сән көдлмш кегджәхинь күүкд күн темдглнә. Өдр-сө уга энд полицин көдләчнр церглнә, видеокамер углж тәвгдв, вокзалын герт орхин өмн төмр предметмүд илткдг оборудовань көдлжәнә. Энүнә нилчәр зеткртә йовдлмудас гетлж болх.
Галина Пескован келсәр, нәәмн жилдән долан хонг болһн Волгоградас Элст балһснд йовна. Әәмшг уга бәәлһнә халхар дала көдлмш кегдж.
Әрәсән болн һазадын ордудын дамшлтар, террористическ актмуд дару-дарунь нурһлж олна көлгн-күчнд учрна. Давсн жилин чилгчәр Волгоград балһснд төмр хаалһин вокзалд болн троллейбуст учрсн зеткртә йовдлмудын ашт дөч һар күн әмнәсн хаһцв. Энүнәс иштә ирлцнһү федеральн программ шинәс күцәх даалһвр дотр-дундын кергүдин министерствд Әрәсән правительствин ахалч Дмитрий Медведев өгв. Эн программ давсн жилд төгсв. Шинәс программ күцәхин төлә кесг жува арслнг йилһж өггдх. Көлгн-күчнд әәмшг уга бәәлһнә төрт мана танһчд ик оньг тусхагджана. Үлгүрнь, Калмавтовокзалд хойр минһн арвн негдгч жилд цевр һазр нертә хаша тосхгдв, виедкамер углж тәвгдв, төмр предметмүд илткж авдг оборудовань бәәнә. Әәмшг уга бәәлһнә церглтин болн зөв-йов харлһна органмудын көдләчнр обьектд диг-дара харж церглжәнә.
“Калмавтовокзал” нертә ниицәнә көлгн-күчнд әәмшг уга бәәлһнә әнгин ахлач Мингиян Бадминовин келсәр, автовокзалд әәмшг уга бәәлһнә бәәдл тетклһнә төлә көдлмш оньдин кегднә. Өдр-сө уга көдләчнр диг-дара харжана. Видеокамер һаза болн вокзал дотр углж тәвгдв, энүгәр өдр-сө уга бүртклһн кегджәнә. Давсн жилд вокзалын һаза шлагбаум тәвгдв. Ода зуг шишлнг көлгн-күчн нааран орж ирж чадх болн автобусмуд. Эзнә машид орж чадшго.
ВЗК: Тер мет әәмшг уга бәәлһнә төрт ик оньг Элст балһсна төмр хаалһин вокзалд тусхагджана. Нег үлү, удл уга Элст балһснд олимпийск һал ирхмн. Иим ик чинртә керг-үүлдвр күцәсн кемд полицин көдләчнр болн талдан чигн зөв-йосна органмудын элчнр олна диг-дара харлһан туст ирлцнһү көдлмш күцәх.
Хальмг танһчин МВД-н барин церглтин көдләч Андрей Басхаевин келсәр, олимпийск һал тосж авлһна керг-үүлдврин йовудт полицин көдләчнр чанһ неквртәһәр көдлх. Эстафет болсн кемд өдр-сө уга полицин көдләчнр көдлх. Олимпийсмк һалын маршрутин тускар олнд зәнглһнә эв-арһ зәнглх.
Көлгн-күчнд әәмшг уга бәәдл тетклһнә талдан нег халхнь Элст балһснд әмт зөөдг халхар әәмшг уга бәәдл тетклһн. Хотл балһсна хаалһст давн жилин август сарас авн арвн зурһан шин автобусмуд йовжана. Әмтнә тоолврар, маршрутн автобусмудла дүнцүлхлә, иим автобусар йовхд әәмшг уга болна.
Эн күүкд күүнә келсәр, маршрутн автобуст йовж йовад, унад, шав авч. дегд түргәр эдн йовна. Эн күүкнә келсәр, “ПАЗ” автобусар йовхд әәмшг уга болна, санамр. Автобусмудын жолачнр болһамжтаһар йовна. Автобусмудт видеокамер бәәнә. Эннь әәмшг уга бәәдл теткжәнә.
Күн болһн әәмшг уга бәәж, эврәннь өөрхн улсин әәмшг уга бәәлһнә тускар санх зөвтә. Эннь күн болһна зөв болжана. Энүнә төлә көлгн-күчнд әәмшг уга бәәлһнә бәәдл тетклһнә керг-үүлдврмүд мана танһчд күцәгджәнә. Тер бийнь зеткртә йовдлмудла күн болһн харһх әәмшг бәәнә. Тегәд күн болһн саг бәәж, әәмшгу га бәәлһнә төрт ик оньг тусхах зөвтә.
Елена Алексенко, Максим Мятежный
