Кластерн систем орулһна тускар селвлцән болв
Мана регионд өдгә цагин дөрлдәнә таалд селәнә эдл-ахун предприятьмудыг дөннхин төлә кластерн систем кергтә. Шишлнг бүрдәсн хүүвин түрүн сүүрин орлцачнр иим тоолврта бәәнә. Сүүрт правительствин ахлач Игорь Зотов, селәнә эдл-ахун, экономикин министерствсин, агропромышленн комплексин номтнр орлцв. Кластер гисн шин производсвенн эв-арһар олзлж иннновационн программар негдсн нкцлтин хамцу үүлдвр болжана.
Хүүвин сүүрин йовдут зүткәтә күүндвр һарв. Энүнд орлцачнр мана регионд агропромышленн кластер бүрдәлһнә тускар эврәннь ухан-тоолвран медүлж чадв. Дөрлдәнә халхар ода кластер ик чинр зүүжәнә. Тегәд иим шин системин тускар селәнә эдл-ахун олн көдләчнр соньмсжана. Йосна элчнрин халхас болн арһлачнрин талас дамшлтын халхар соньмсулна.
Олн-әмтнә хуралд танһчин толһачин элч Виталий Дагиновин келсәр, кластерин күцлнь иим. Танһчин правительств күн болһн эврәннь көдлмшән кехд дөн күргх зөвтә. Кеж һарһсн продукцин чинрәр мана селәнә эдл-ахун предприятьмуд нарта-делкән кемжәнлә ирлцх зөвтә. Теегт мал идшлүлж өскәд, һарһсн хот-хол болн продукц нарта-делкән рынкд һарх зөвтә.
Селәнә эдл-ахун предприятьмудыг дөннхин төлә олн-зүсн эв-арһ бәәнә. Үлгүрнь, мал бордлһна комплекс тосхснд, тохма мал өсклһнд, малын бат көрнг белдж авлһнд дөнцл мөнгн өггднә. Сүүрин орлцачнрин тоолврар болхла, агропромышленн халхар үүлджәх предприятьмуд нег технологическ кергт орлцхд кластерн эв-арһ сән нилчән күргнә. Аштнь цуг орлцачнрнин чидләр кеж һарһсн продукцин чинр өөрхн залһлдата.
Танһчин экономикин болн хулд-гүүлгәнә министрин негдгч дарук Боова Бадмаевин келсәр, үлгүрнь, буудя урһаж авсн күн энүг хулдж чадхий гиж алмацна. Ямаран үнәр хулдхин тускар медхш. Болв эн күн урдаснь ямаран үнәр хулдхин тускар медхлә, санамр көдлж чадх. Темглсн күүнд бүүдя урһаж авхан медсн селәнә көдләч әәмшг угаһар көдлх. Буудя олна малд оньдин кергтә болна.
Танһчин селәнә эдл-ахун министр Петр Ланцановин келсәр, ода хальмгин селәнә эдл-ахун предприятьмудын кеж һарһсн продукц талдан регионмудла дөрлдж чаджахш. Специалистнрин тоолврар, кластерн эв-арһар талдан субьектмудла дөрлдж чадх селәнә эдл-ахун продукц кеж болх. Энүнә һол күцлнь — селәнә эдл-ахун предприятьмудт дөн күргсн деерән, иргчдән мана танһчин агропромышленн комплексин делгрлтин бат ул тогтаж болх.
Танһчин селәнә эдл-ахун министр Петр Ланцановин келсәр, эндр өдрт эн төр хамгин ик чинртә керг болжана. Кластер бүрдәхлә мана селәнә эдл-ахун көдләчнрин һарһсн продукц ьалдан регионмудла дөрлдж чадх. Ода болхла малын продукц эд-бод келһнә, маылн хот белдлһнә халхар дуту-дундс бәәнә. Нег эдл-ахуд мөнгн ховр болад цуг халхар селәнә эдл-ахун продукц кедг арһ уга. Энүнә төлә кластер нөкд болх зөвтә.
Сүүрин ашт агропромышленн кластерин орлцачнр хоорнд ирлцнһү зөвшәлт батлж авлһна халхар көдлмш күцәх шиидвр батлж авгдв. Дарани иим сүүрт кластерн эв-арһин тускар тогтавр батлгдх. Кластерн эв-арһ олзлхла межрегиональн болн нарта-делкән хоорндк экономическ нөкцлт цаарандан делгрлт авхмн. Энүнә тускар хүүвин түрүн сүүрин орлцачнр келв.
Ээнән Ольга, Хавтхна Анатолий
