Ралли-рейдын орлцачнр Элстд амрв
Алдр Торһн Зам нертә нарта-делкән ралли цаарандан болжана. Энүнә өмн өдр автоспортсменмүд хальмг танһчин толһач Алексйе Орловла харһлт кев. Эндр Элст балһснд Алдр Торһн Зам нертә нарта-делкән ралли-рейдын дарани девснг болжана. Энүнд хөрн долан орн-нутгас нарта-делкән чемпионатмудын нертә спортсменмүд орлцжана. Ралли рейдын хаалһ Баһ Дөрвдә, Октябрьск, Целинн, Яшкульск, Үстин, Хар Һазра болн Ик-Буурла райодын аһуһар давж һарв. Ут-тоодан автоспортсменмүд дөврн минһн дуунад дөрлдв. Ралли-рейд июлин арвн һурвнд Әәдрхн балһсна Кремлин өөр төгсхмн.
Ралли-рейдын дөрвдгч девснг төгсв. Элстин бивуакд автоспортсменмүд амрад, марһана дарани девснгд белдж чадв. Эднә төлә Хальмг танһчин үүдәчг коллективмуд соньн концерт үзүлв.
Келхд, дөрлдәнә орлцачнр мана танһчин өвәрц сойлла болн зангшалла түрүн болж таньлджахш. Урднь эн бас нааран ирсн билә. Эднә зәрмнь иим марһанд жил болһн орлцна.
Автоспорт маз командын пилот Александр Василевский келсәр, марһана орлцачнр дөрлдсн деерән, машидын шинжлж хәләжәнә.
Тер мет ралли-рейдын орлцачнриг йөрәхәр танһчин һардачнр ирв, тер тоод хальмг танһчин толһач Алексей Орлов, правительствин ахлач Игорь Зотов, Элст балһсна мэрийн толһач Артур Дорджиев нааран ирв. Эднә төлә раллин административн директор Артем Якубов бивуак үзүләд, экскурсь кев. Автоспортд дурта Алексйе Орлов Эдуард Николаевин залжах “КамАЗ” машинд орад суув. Эннь спортсменмүдин авьяс эвдсн йовдл болж һарв. Юнгад гихлә, марһана йовудт автогоншикүд эврәннь машиндан талдан улсиг орулхш.
Энүнә хөөн танһчин толһач раллин орлцачнрла пресс-конференцд орлцв. Тер мет марһана орлцачнрт Хальмгин хурлын ламнр цаһан хаалһ дурдж маань умшв.
Хальмгин толһач Алексей Орловин келсәр, жил ирвәс мана танһчд раллин орлцачнрин то өсәд йовна. Эннь байрта йовдл. Спортд болн Алдр Торнһ Зам нертә ралли-рейдар олн улс соньмсжахин темдг болжана.
Дөрлдәнә бүрдәһәч Семен Якубовин келсәр, Әрәсән нег регионас талдан регионд одхла, талдан орн-нутгут одснла әдл болна. Ралли-рейдын орлцачнр хальмг танһчд ирхдән дурта. Эдн хальмг улсин уул авьяс-зангшалла, сойлла таньлдж ик байр үүдәнә.
Алдр Торһн зам нертә раллин ах бүрдәһәч Семен Якубовин келсәр, шишлнг тосхгдсн бивуакт Хальмг танһчин улсин тосжана. Хальмг улс оньдин бүләнәр автоспортсменмүдиг тосна. Келн-улсин уул авяьс соньн болв, эннь ралли-рейдыг кеерүлв.
Иим ик чинртә марһана тускар олн журналистнр бичнә. Париж-Дакар хоорндк марһана хөөн Алдр Торһн зам ралли чинрәрн хойрдгч ормд йовна. Нарта-делкән чинртә дөрлдәнә тускар зун дөчн журналист зәнглж бичжәнә. Эднә төлә шишлнг штаб бүрдәгдв. Эдн самолетар нисәд, ралли рейдын орлцачнрин ард йовна. Автомотоспортын нертә орлцачнриг олн улс үзж чадсн уга. Юнгад гихлә, талдан улсин бивуакд орулсн уга. Зуг олн үртә өрк-бүлмүд эдниг үзж чадв. Эднә төлә шишлнг экскурсь кегдв.
Эн күүнә келсәр, ралли рейд йир икәр таасгдв. Соньн машид, тер тоод “КамАЗ” машин таасгджана. Хамгин түрүн техник таасгдв гиж эн келнә. Бичкн көвүдин темдглсәр, машид икәр таасгджана. Эдниг хәләхд соньн болв гиж эн көвүн темдглв.
Халун цунцг өдрин хөөн, асхлад серүн орв. Марһана орлцачнр амрад, иргч дөрлдәнд бийән белдв. Эндр эдн дарани девснгд дөрлдх. Эн саамд раллин орлцачнр Элст-Әәдрхн хоорнд дөрлдхмн. Аца зөөдг болг гиигн машидын дунд дииләчнрин нериг автоспортд дурта улс июлин арвн һурвнд медх. Эн өдр ралли рейд Әәдрхн балһснд төгсхмн.
Елена Алексенко, Котина Валерий
