Кесг жил болад харһв
Кесг жил болад харһв. Эн жил хальмг улс Сиврт күчәр нүүлһснә һашута далн жилин өөн күцжәнә. Киитн холл һазрт бәәсн хальмгуд күзүцә зовлнг үзәд, төрскн һазртан хәрж ирсмн. Сиврт ямаран күнд цаг болв чигн, күүкдән һарһад, өскәд, кү кев. Арвн дөрвдгч школыг Казахстана Аральск балһснд бәәсн улс тодлжана.
Владимир Тена өрк-бүл һучн доладгч жилд туугдв. Талдан һазрт күчәр нүүлһсн келн-улсин дунд хамгин түрүнд хол дорд үзгин корейцнриг тууврт йовулв. Аральск балһснд эднлә хамдан талдан чигн цаажла харһсн келн-улс, тер тоод хальмгуд бәәсмн. Бичкн цаган хальмгудла давулв гиж Владимир келнә. Ода эднлә интернетар дамжулад хәрлцә бәржәнә. Болв одахн Хальмг танһчд одх саам учрв.
Владимир Тена келсәр, түрүн болж ирәд, зүркн шарклв. Нег һазра улслаһан харһснла әдл болв. Казахстанд чечен келн-улс, корейцнр, хальмгуд билә. Цугтан ни-негн нег өрк-бүл кевтә бәәләвидн.
Аральск балһснд олн-зүсн наста улс бәәсмн, тер бийнь эдн нег школд сурв. Олн-зүсн цагт школд сурсн бийнь, эннь эдниг негдүлжәнә. Аркадий Нигмярович Васильев Аральск балһснд бәәсн цагиг бүлән үгмүдәр тодлна.
Аркадий Васильевин келсәр, дөчн зурһадгч жилд төрж. Аральск балһснд бичкдүдин садт одсан мартшго, энүнә хөөн школд сурв. Тенд дөрвн класс төгсәһәд, хәрж ирв. Бичкн цаган гем уга сәәнәр давулв. Бәәдл-жирһл му болсн уга. Тенгст өөмдг бәәж. Энүнә санлд Аральск балһсн хамгин сәәхн балһсн болж үлдв.
Виктор Улюмджиевич Килганов арвн хойр настадан төрскн һазрасн нүүлһж. Баһ-дүүвр насан Аральск балһснд давулв. Школан алтн медаляр төгсәв. Аральск балһснд бәәсн хальмгуд тодлврмуд әдл. Энүнә тускар эн иигж келнә.
Виктор Килгановин келсәр, поездар нүүлһсинь тодлна. Хамгин түрүнд Аральск заһсна комбинат санлд орна. Хальмгудыг цасн деер буулһв. Тенд өлсәд харһнсн цаган мартшго.
Элст балһснд харһад эдн кесгтән хамдан йовад Аральск балһсиг тодлв. Казахстанас ирсн гиичд Исход и возврашение нертә бумб үзүлв. Эн бумб болн товарн вагон — энтн йоста музей болжана. Цаажал харһад Сиврт ясан үлдәсн улсин санлд нерәдгдсн бумб болжана.
Батан Санжирма, Максим Мятежный
