Целинн район далн тавн жилин өөнән темдглв
Ик кесгәс авн күләжәсн байр болв. Целинн района әмтн эврәннь района далн тавн жилин өөн өргмжтәһәр темдглв. Эн өдр орсн хур боомтг болсн уга. Троицкое селнәд болсн байр бәәрн улсин зүркнд кесгтән төөнрж үлдх.
Синоптикүдин тааврас әәлго байрин бүрдәһәчнр эн өдр шүүж авч. Һучн нәәмдгч жилд бас имм киитн өдр январь сард Хальмгин автономн советск социалистическ респуюликин картд шин район — Троицкий район тогтсмн. Тер цагас авн энүнә тууж тасрсн уга. Эндр өдрт Целинн район Хальмг танһчд хамгин ки административн аһу болжана. Энүнд өдгә цагт хөрн минһн күн бәәршлжәнә. Эднәс олн әмтн танһчин туужд нерән туурулад, йоста баатрмудын нер зүүжәнә.
Целинн района администрацин толһач Виктор Джанджиевин келсәр, эннь Социалистическ күч-көлснә героймуд Василий Никифорович Ануфриенко, Степан Михеевия Запариванный, Һаха Пюрвеевич Андреев, хальмгин түрүн герой Ханбаба Надирович Мерзиметов, ордлен зүүһәч Үлмж Санчирович Санчиров, Николай Максимыч Завгородний, Галина Григорьевна Чабанюк, Кермн Буратаевна Мучкаева. Талдан чигн нүүрлгч көдләчнр бәәнә.
Ке-сәәхн театрализован нааднд района делгрлтин хамгин ки чнртә девснгнь цуглдсрн улст дәкәд нег тодлулж өгв. Района әмтн эврәннь бичкн төрскн һазрарн һахмж кеһәд, улм ни негн бат залһлдата болж медгдв. Района нер холд туурулсн улс дунд күч-көлснә ветеранмуд, төрскнә харсгч дәәнә орлцачнр, ачта багшөнр, эмчнр, механизатормуд, малчнр, фермермуд. Ода Целинн района аһуд һучн тавн келн-улсин элчнр бәәршлжәнә. Эдн арвн негн селәнә муниципальн бүрдәц элчлжәнә. Раойна байрт хөрн тавн селәнә бәәрн улс ирж орлцв.
Танһчин толһач Игорь Зотов иигж келв: “Мендвт күндтә үүрмүд. Тана ончта өөнлә цуг таанриг йөрәжәнәв. Района цецгәрч, делгрлт автха. Района цуг улст бәәхтә жирһл дурджанав. Эрүл-менд байн бәәтн. Таднд нөкд болхвидн. Ончта өөнлә йөрәжәнәв”.
Елена Решетникова Целинн районд төрәд, насни туршт энд көдләд, талдан һазрт нүүхәр седсн уга.
Байрин йовудт хамгин нүүрлгч көдләчнрт өөдән ачлврмуд бәрүлж өгв. Тер тоод танһчин правительствин күндлһнә һашгуд бәрүлж өггдв, һурвн күн Хальмг танһчин күндтә гражданина нер зүүв. Района багшнрт болхла эн өдр хойр дам байр болв. Района байр багшин сән өдрлә ирлцж давулгдв.
Городовиковин нертә Троицкое селәнә гимназин директор Валентина Убушаеван келсәр, Целинн район өвәрц һазр. Районд хамгин олн улс бәәршлжәнә. Энд билгтә улс дала.
Әрәсән эрдм-сурһулин ачта көдләч Алла Думинован келсәр, районд ода талдан танһчин һазрас олн әмтн нүүж ирв. Олн келн-улсин элчнр бәәнә. Эдн цугтан ни-негн бәәнә. Байрин йовудт эннь ил үзгдв.
Хальмг танһчин ачта багш Александра Боваеван келсәр, Целинн районд билгтә багшнр көдлжәнә. Эдн бичкн төрскн һазран туурулв.
Хотл балһснас хамгин өөрхн бәәх Целинн района тууж цаарандан бичгджәнә. Энүг бәәрн улс бичжәнә.
Хавтхна Элла, Эрнжәнә Эрднь
