Келн-улсин музейд Һәрә Рокчинскийн һәәхүл секгдв
Пальмовин нертә келн-улсин музейд Әрәсән олн-әмтнә зурач Һәрә Олегович Рокчинскийн йирн жилин өөнд нерәдгдсн һәәхүл секгдв. Шин һәәхүлд хәләһәчнр зун хөрн тавн көдлмш хәләж чадх. Эннь музейин болн зурачин күүкн Светлана Батыреван хуранһуһас тәвгдв.
Хальмг танһчин сойлын ачта үүлдәч, Ока Иванович Городовиковин нертә государственн мөрән лауреат Гарри Рокчинскийин ончта өөнд нерәдгдсн конференцт танһчин сойлын халхин һардачнр, зурачнр, номтнр, элнг-саднь орлцв.Энүнәс нань талдан балһсдас ирсн номтнр бас орлцж алдр зурачин тускар зәнгллһ кецхәв. Әрәсән олн-әмтнә зурач, танһчин өдгә цага искусствин ул татсн күүнә негнь Гарри Рокчинскийин үүдәврмүд зуг танһчд биш, талын олн һазрмудар темдгтә.
Гарри Олегович Рокчинскийин үүдәврмүд Әрәсән олн келн-әмтнә сойлын нег ик халх тогтажана гихлә чик болхмн. Зурачин хамгин нертә үүдәврмүд дунд “Ээж болн ач”, “1812-гч жилә дәәнә баатр Цо-Манж Буратов”, Жанһрч ЭЭлән Овла онц орм эзлж йовна. Нег һарра улснь, элгн-саднднь Гарри Рокчинскийин бәәдл-жирһл йоста бахмж, үзмж мөн.
Хальмг келн-әмтнә музейд Рокчинкийин зун көдлмш хадһлгджана. Ончта өөнд нерәдгдсн һәәхүлин йовудт әмтн 125 һар соньн зургуд үзж чадхмн.
Иим улсин нерн олн-олн жилмүдин эргцт дорас өсч йовх үйнрт үлгүр-үзмж болад йовх зөвтә.
Нәдвдә Тамара, Хавтхан Анатолий
