Грозный балһснд сойлын фестиваль төгсв

Грозный балһснд болсн “Традиции гор” нертә сойлын болн туристическ фестивалин орлцачнр эврәннь сойлла олн улсиг таньлдулв. Хальмг танһчас энүнд Өөрднр театр орлцв. Фестивалин тускар Чечняһас мана үүдәчг баг материал цокж авв.

Фестивалин һол керг-үүлдврт гала концертд бүрдәһәчнр сән белдвр кеж. Хойр өдрин эргцд артистнр тохнята белдвр кеһәд, ке-сәәхн Грозный балһснла таньлд цаг үлдсн уга. Тегәд концертин хөөн Чечнян хотл балһснла гиичнр сөөһәр таньлдж чадв. Эннь эднд йоста байрта белг болв.

Олн-әмтнә үүдәлтин цутхлнгин һардач Рамзан Даудовин келсәр, Кавказ улсин сойлын иим байр бүрдәх санан ик кезәнәс авн орсмн. Зуг ода энүг бәәдл-жирһлд тохраж чадв.

Олн-әмтнә үүдәлтин цутхлнгин директор Рамзан Даудовин келсәр, Хальмг танючла өөрхн залһлда бәржәнә. Хальмг танһчд дурта. Хойр келн-улс туужин халхар залһлдата. Энүг күндлж тевчх кергтә.

Хальмг танһчас фестивальд Әрәсән искусствин ачта үүлдәч Петр Надбитов һарджах Өөрднр нертә государственн бииһин театр орлцв. Мана танһчин билгтә үүлдәчиг Әрәсәд болн һазудын ордудт сәәнәр меднә. Рамзан Даудовин келсәр, энүнә һарджах коллектив фестивальд орлцхла йоста байр болна.

Өөрднр театрин художественн һардач Петр Надбитовин келсәр, иим фестивальд өнц эврә сойлан үзүлх санан бәәнә. Театрин үзүлсн композиц олн улст таасгдв. Энүнә тускар специалистнр харһад келнә.

Сойлын болн туристическ форумд бүрдәһәчнр ик кезәнәс авн белдвр эклсмн. Энүнә бүрдәһәч Тимур Алханишвили келсәр, иим керг-үүлдвр түрүн болж бүрдәгджәнә. Энүг иргчдән сән зангшалд тохраж жил болһн кех зура бәәнә.

Кесг частан болсн белдврин көдлмш төгсв. Ода артистнр көгжмәр болн бииһәр дамжулад эврәннь келн-улсиннь сойлын тускар олн әмтнд келж өгхдән белн бәәнә. Фестивалин күндтә гиич болж Чеченск республикин толһач Рамзан Кадыров ирв. Келхд, сойлын делгрлтд болн хам-хоша бәәх регионмудла залһлда бәрлһнд энд ик оньг өггджәнә. Арстинрин билг-эрдмиг олн-үзсн бүләнәр тосж кесгтән альх ташв. Өөрднр театрин үзүлсн Кочевники нертә композициг хамгин бүләнәр тосж авв. Хальмгин артистнрин билг-эрдм цуг улст таасгдв. Энүг фото болн видеозургт цокж авв.

Эн күүкд күүнә келсәр, эврәннь бичкн цаган тодлв. Казахсанд бичкн цагтан өсж. Хальмг танһчин артистнрт ханлтан өргжәнә. Эн залу күүнә келсәр, альхан ташад бәәж, һарнь улаж одв. Хальмгин артистнр эврәннь бииһәрн кесг минһн жил хооран мадниг күргв. Цугтан туужиг тодлв. Үзүлсн тег икәр таасгдв. Йир икәр таасгдв. Хальмг танһчд иим коллектив бәәснь ик байрта йовдл гиж эн залу күн келв.

Грозный балһснд болсн фестиваль олн улсин санлд кесгтән байрта йовдл гиж үлдхнь лавта.

Хавтхна Элла, Очра Сергей