Инвалид улсин төлә программ батлж авв

Сүл арвн тавн жилд Әрәсәд инвалид улсин то зурһан сай улсас арвн негн дундур сай улст күрв. Жил болһн һурвн сай күн инвалид гиж тоолгдна. Иргч хойр жилд спортивн обьектмудт оборудовань хулдж авхин төлә нег жува арлснг йилһж өггдх. Эннь эн жиллә дүнцүлхлә арвн холванд ик болжана. Энүнә тускар Әрәсән күч-көлснә болн социальн харлстын министр зәнглв.

Ода Хальмг танһчд хөрн дөрвн минһн инвалид күн бәәнә, эднәс хойр минһн бичкдүд. Арнзл Болдырев бичкн цагасн авн инвалид. Тер бийнь көвүн зовлнгдан даргджахш. Арнзл олн-зүсн танһчин сойлын болн спортивн марһаст шунмһа кевәр орлцна, талдан регионмудт болдг керг-үүлдврмүдт орлцна.

Арнзл Болдыревин келсәр, танһчин спортын министертств инвалид улст арвн дөврдгч бичкдүдин школд спортар көдлх орм өгв. Тенд настольн теннис наадна. Эврән наадад, талдан нәәжнрән дуудна. Нарн өдр болһн хойр частан наадна. Ода саадгар халһна федерац үрвр кежәнә. Иим келн-улсин спортан көдлж чадх инвалидмуд одх.

Тер саамд Арнзл Болдыревд болн энүнә нәәжнрт спортар энүнәс икәр көдлж чадх арһ учрх. Хальмг танһчд иргч дөрвн жилд Доступная среда нертә государственнр программ батлжа вгдв. Энүнә төлә арвн дөрвн шаху сай арслнг йилһж өггдхмн. Эн программ күцәсн цагт спорт дик оньг тусхагдх. Региональн программин цуг кемжәнәс арвн процентнь спортивн сооруженьст йилһж өггдх. Танһчин спортын, баһчудын болн туризмин министерствин зәнглсәр, өдгә цагт нег минһн һурвн зун инвалид улс спортар соньмсжана. Болв эннь танючд бәәх цуг инвалидмудын тооһас дегәд бичкн то болжана. Зуг шин батлж авсн Доступная среда программин нилчәр иим улсин то зөвәр өсх.

Танһчин спортын, туризмин болн баһчудын политикин министр Александр Гедерим келсәр, хөрн нәмән күн танһчин спортын бичкдүдин школд настольн теннис наадан. Арвн дөврн күн мөрнә спортын школд көдлжәнә. Ода хойр-һурвн минһн инвалид улсиг спортар соньмсулх зура бәәнә.

Шин программар түрүн керг-үүлдврмүд бүрдәж давулгджана. Эн жилин хаврар үүдәгч фестиваль болв. Энүнд танһчин цуг райодас инвалид улс ирж орлцв. Ода шин программар талдан чигн керг-үүлдврмүд бүрдәгдх, инвалид улсин бәәцин таал ясрх, сул цаган эдн сергмжтәһәр давулж чадх.

Танһчин эрүл-менд харлһна болн социальн делгрлтин министрин дарук Любовь Джексембекован келсәр, инвалид улсин төлә пандус, шишлнг эв-арһ тосхгдх зөвтә. Инвалид улс боомтг угаһар соицальн болн сойлын обьектмудт орж чадх зөвтә.

Тер мет шин программар бөдүн улсин төлә реабилитационн цутхлнг тосхгдх. Энүнә нег плошадкнь Үстин района Сюмин булг санаторьт көдлх.

Министрин дарук Любовь Джексембекован келсәр, иим плошадкиг гемтә улсин төлә олзлх зура бәәнә. Плашадк му биш, ода зуг реабилитационн туслмж күргх лицензь авх кергтә.

Инвалид улсин төлә цуг кергтә таал бүрдәгдх зөвтә. Эн көдлмшиг хойр минһн арвн доладгч жил күртл кех зура бәәнә. Тиигхлә инвалид улсин бәәдл-жирһл невчк гиигрх зөвтә.

Баира Петрова, Ирчин Алексей, Максим Мятежный