Хот-хол үнтәрв

Такан өндгн үнтәрв. Энүнә учрнь ямаран? Сүл цагт эн төрәр Әрәсән регионмудт зүткәтә күүндвр болжана. Сентябрь сард арвн өндгн һучн арслнг күрдг бәәсн болхла, ода тәвн, зәрм һазрт далн арлснг күрчәнә. Калмыкиястатын то-дигәр махна болн үснә зүүтә хот-хол бас үнтәрв.

Эн күүкд күүнә келсәр, оньдин энд хулд кенә. такан өндгн тәвн негн арслнг күрдг билә. Махн, үснә зүүтә хот үнтәрв. Нәәмн-арвн минһн пенсьта улс яһж бәәхмб? Дегд икәр хот —хол үнтәрж, урднь һарас өндг дөчн арслнгар хулдж авдг билә, ода тәвн арлснг күрчәнә. Зәрм магазидт далн арслнг болв гиж күүкд күн келнә. Эн залу күүнә келсәр, Сиврт эн һазрас хот-хол кимд. Помидор, боднцг Сиврт кимд. Энд боднцг хол һазрас авч ирнә, тегәд үнтә болжана.

Хулдачин келсәр, олн-үзсн өндгн бәәнә, хамгин сәнь тәвн һурвн арслнг күрчәнә, негдгч сорт тәвн, хойрдгч сорт дөчн зурһан арслнг күрнә.

Оптов базд бәәх олн әмтн сәәнәр меддг киоскд одвидн. Энүнд талдан хулд-гүүлгәнә киоскмудас такан өнлгнә үн невчк кимд. Арвн өндгн дөчн зурһан — тәвн хор арлснг күрчәнә. Элст балһснд шовуна фабрик көдлсинь хулдач Иванов ода күртл тодлна. Өндгә үн иигж икәр үнтәрсинь хулдач тодлхш. Ивановин тоолврар, электрокүчн үнтәрнәс көлтә өндгн бас үнтәрв. Ода такан өндгиг хальмг танһчд Ставропольск крайяс болн Волгоград балһснас авч ирнжәнә. Эдн энүнә үнинь эврән тогтана.

Хулдач Сергей Ивановин келсәр, Волгоградас болн талдан һазрас хот-хол зөөнә. Электрокүчнәс көлтә үнтәрсн уга. Ипатово балһснас авч ирсн ээзгә бас үнтәрв. Энтн иклограмм буудя хайчкад, така асрдг керг биш. Электрокүчсн бас кергтә.

Хальмгин федеральн антимонопольн церглт эн продуктын үнин өслт бүрткж хәләв. Энүнә ашар зака эвдсн йовдл илткгдсн уга. Арһлачнр хоорндан үгцәд иим үн тогтаснь бас илткгдсн уга. Ода нег такан өндгн тавн-зурһан арслнг күрчәнә.

Хальмг танһчар федеральн антимонопольн церглтин директорин дарук Владимир Манжиковин келсәр, такан өндгин үн бүрткж хәләжәнә. Энүнә тускар хәрү авхар эрлһ йовулсн биләвидн.

Тер мет Калмыкиястат сар болһн хот-холлын үн хәләж бүрткнә. Эднә шинжлтәр хот-хоолын үн октябрь сард зун негн процент тогтав. Давсн жилин декабрь сарла дүнцүлхлә, үн зурһан дундур процентд өсв.

Калмыкиястатын әнгин ахлач Эльза Анджаеван келсәр, эн сард урдк сарла дүнцүлхлә, хот-хол үнтәрв. Ода зун зурһан дундур процент тогтав. Хамгин түрүнд хот-хол үнтәрж. Тер тоод такан өндгн, үснә зүүтә хот-хол, темсн үнтәрв.

Хулдач Анна Козлован келсәр, сүл цагт тас ору угаһар көдлжәнә. Энүнә тоолврар үн дегд икәр өссн уга. Болв әмтн хот-хол баһар хулдж авдг болв.

Анна Козлован келсәр, ода хулд-гүүлгән мууһар кегджәнә. хот-хоолын үниг предприятьмуд эврән тогтажана. Мадн авч ирсн продукц хулднавидн.

Тер мет темснә үн бас кимдрджәхш. Ода балһсна цуг рынкмудт үн әдл. Нег килограмм бодцнг хөрн-хөрн тавн арслнг күрчәнә. Энүнә үн альдас авч ирснәс тогтна.

Танһчин социальн делгрлтин, күч-көлсн болн улсиг көдлмшәр тетклһнә министерствин келсәр, әмтнә эдлдг хот-хоолын хамгин баһ кемжән кимдрв. Эннь зәрм хот-хол кимдрнәс көлтә тогтв. Тер тоод махна, өдмгин, үснә зүүтә зәрм хот-хоолынүн баһрв.

Танһчин улсиг көдлмшәр тетклһнә агентствин һардачин дарук Эльза Нахатинован келсәр, ода улсин бәәдл-жирһлин хамгин баһ кемжән һурвн әнгәр хувагдна. Көдлжәх әмтн, пенсионермуд болн бичкдүд. Хойрдгч кварталла дүнцүлхлә, хамгин баһ кемжән кимдрв. Эннь темсн кимдрнәс көлтә тогтв.

Статисткин то-диг рынкд тогтсн бәәдлиг чикәр үзүлжәхш. Шин жилин байрин өмн өргнд хот-хоолын үн дәкнәс өсх. Тер тоод такан өндгн, үсн, махн, темсн үнтәрх. Өдгә цагин үн авад хәләхлә, шин жилин байрин ширәд кесг мөнгн кергтә болх.

Батан Санжирма, Максим Мятежный