“Харада” клубд баһчуд сул цаган олз-тустаһар давулжана

Билгтә спортсменмүдиг белдхин туст “Харада” нертә спортивн баһчудын клуб бат орман эзлжәнә. Тер мет клубын гешүд шатр наадг дасжана, спортивн би биилдг эрдмтә болх. Болв августын нег шинәс авн клуб ясврин көдлмшт хаагджана. Сурһулин шин жилд көвдү-күүкд шинрүлгдсн герт ирж дурта эрдмәрн көдлж чадх.

Нәәжнр Гена болн Ваня өдр болһн Харада клубд ирәд, дөөв, хоккей наадна, хоорндан хәрлцәд күүнднә. Эндр эдн тенгин дәәлдән нертә наад нааджана. Көвүдин келсәр, иим наадн делгрлтд сән нилчән күргнә.

Гена Дармаевин келсәр, нааран ирхдән йир дурта. Энл нәәжнрләһән наадна. Энд настольн теннис, шатр, дөөв наадн бәәнә. Ваня Жуковин келсәр, нааран ирәд шин нәәж олж авна. Наадн дала.

Нег класст сурчах Намжл болн Байр клубд хойр жилдән оржана. Эдн настольн теннис наадхдан дурта. Көвүдин тоолврар, компьютерин ард суухин ормд, эдн цогц-махмудан батрлулх кергтә.

Намжл Болдыревин келсәр, настольн теннис нәәжнрләһән наадхдан дурлна. Гертән иигж наадж болшго.

Байр Кубышкина келсәр, иим клуб бәәснь йир сән керг. Зунын кемд сул цаг дала. Нааран ирәд настольн теннис наадж болх.

Олн-зүсн нааднас нань клубд спортивн секц көдлжәнә, наадһасин театр бәәнә, урн һарин эрдмтә улсин кружок үүлджәнә. Энд эврә футбольн команд бәәнә. Эдн кесг дәкж олн-зүсн марһаст орлцад, призермудын тоод орв. Багшнрин темдглсәр, ода бичкдүд бииһәр икәр соньмсжана. Эднд бииһин эрдм професииональн хореограф дасхжана. Галина эврә эрдмдән йир дурту күн. Клубын нег хорад эврәннь чидләрн ясвр кеһәд, сурһульчнрла дамшлтарн хувалцжана.

“Харада” клубын бииһин багш Галина Раднаеван келсәр, зал бичкн болад, дала бичкдүд авч болжахш. Нег багд арвн көвүн-күүкн оржана. Өдгә цагин би дасжана, гимнастикар бичкдүд соньмсжана.

Багш Екатерина Петрован келсәр, ода клубд дөчн көвүн-күүкн оржана. Клубд Екатерина Петрова түрүн өдрәс авн көдлжәнә. Бичкдүд сул цагтан дурта эрдмәрн подвалын хорад көдлжәнә. Энүнд капитальн ясвр кех кергтә. Наадлһан залд пол цуцад ясгджана, шин линолеум делгх ул белдгдв. Бөкнр ноолддг залд аһар цеврлһнә систем углж тәвх зура бәәнә. Энүнд ода усна сурвлж орулв.

“Харада” нертә спортивн бичкдүдин муниципальн клубын багш Екатерина Петрован келсәр, ода клубд бичкдүдин хойрдгч үйнр иржәнә. Өсәд боссн улс эврәннь көвүд-күүкдән дахулж ирнә. Дурта эрдмәрн сул цагтан көдлхд цуг таал энд бүрдәгдв.

Удл уга клубын гериг ясврин көдлмшт хаах. Тер бийнь учрсн завср көвүд-күүкдиг һундажахш. Сентябрин нег шинәс авн эдн шинрүлгдж ясгдсн хораст дурта эрдмәрн көдлж чадхмн.

Ээнән Делгр, Ирчин Алексей