Цаһан Амнд баһчудын фестиваль болв
Танһчин болн муниципальн керг-үүлдврмүдт шунмһа кевәр орлцжах көвүд-күүкд Цаһан Амн селәнд болсн баһчудын фестивальд орлцв. Һурвн өдрин эргцд көвүд-күүкд эдниг үүмлжәх төрмүдәр күүндвр кев, олн-зүсн спортивн марһаст чидлән сөрв.
Ижл һолын зүн көвә һурвн өдртән палаточн балһснд хүврв. Бүрдәһәчнрин келсәр, иим таалд күн тесллтә болн олмһа болна. Фестивалин программар баһчудт өгсн даалһврас болн марһанас нань көвүд-күүкд хот-хол кедг эрдмән үзүлв. Мана үүдәчг баг ирсн кемд Ирина болн Кема ширә сәәхрүлжәсн бәәж. Күүкдин келсәр, эннь хамгин ик һол төр биш. Хамгин түрүнд энд давулсн цаг кесгтән зүркнд төөнрж үлдх. Марһан болһнд баһчуд гүн медрлән болн олмһаһан үзүлх зөвтә бәәсмн.
Кема Эльтаеван келсәр, программ йир соньн болв. Хойр жил дарандан иим фестивальд орлцжана. Бийднь бас йир соньн болв. Шин инәәжнр олж авв, шин медрл хоршжа авв. Ирина Тугольчаеван келсәр, фестиваль йир икәр таасгдв. Кесгтән тодлврмударн хувалцж болх. Хот-хоолар сәәнәр теткв.
Фествиальд арвн нәәмн наснас авн һучн нас күртл көвүд-күүкд орлцв. Теднә тоод Василий Антипов. Иим керг-үүлдврт түрүн болж орлцжана. Энүнә келсәр, фестивалин йовдут шин медрл авад, бийдән олз-туста дамшлт хоршав. Иим керг-үүлдврт көвүд-күүкд эврәннь ухан-санаһар бәәдл-жирһлд тохраж чадна. Тер мет талдан шунмһа баһчудас үлгүр-үзмж авч болна. Василий Антиповин келсәр, кемр иргчдән иим керг-үүлдвр болхла, эрк биш ирх санан бәәнә.
Фестивалин программар олн-зүсн мастер-классмуд, төгрг ширән сүүрмүд, болв. Эдн баһчудын төрмүдәр бүрдәж давулгдв. Үлгүрнь, баһчудыг олна үүлдврт яһж орулхин болн эрүл-дорул бәәлһнә тускар болсн сүүрт көвүд-күүкд комнадн көдлмшин эрдм дасж авв, эврәннь ухан-тоолвран харсж авх дамшлт хоршав. Күүндврин йовудт шин төсв болн проектммуд һарч ирв.
Үстин района сойлын, баһчудын политикин болн спортын әнгин ах специалист Адьян Болдыревин келсәр, фестивалин программар тренинг-семинар болв. Олн-зүсн наадн болв. Баһчуд санамр, бийән сул бәрәд хоорндан күүндв.
Келхд, зәрм марһаст көвүд-күүкд гертә белдвр кеж чадсн уга. Энүнә таалыг баһчуд дор ормднь медж авсмн. Эннь баһчудт бас соньн болв. Баһчудын келсәр, иим таалд эдн шин дамшлт хоршаж чадв.
Устин района администрацин толһачин медлд үүлджәх баһчудын хүүвин олна организацин ахлач Сергей Даваевин келсәр, иим фестиваль шунмһа баһчудт йир сән нилчән күргх зөвтә. Эдн гер талан хәрәд, энд хоршаж авсн баһчудла көдлх эв-арһ олзлж чадхмн.
Иим фестиваль хойр жил дарандан бүрдәж давулгджана. Тер бийнь, харм төрхд, энүнд орлцх улсин то дегд ик болсн уга. Сергей Даваевин тоолврар, күн болһнла онц кеәвр көдлх кергтә, баһчуд болһнла күр-күүндвр кегдв. Иим фестиваль сән зангшалд тохрх гиж бүрдәһәчнр нәәлжәнә. Иим керг-үүлдвр сән ашта болад, баһчуд олна бәәдл-жирһлд шунмһаһар орлцх гисн нәәлвр бәәнә.
Ээнән Делгр, Бадмаран Владислав
