Хамгин билгтә оютнр государственн деед сурһуляс ик стипендь авхмн
Хамгин билгтә оютнрт государственн деед сурһуль супер-стипендь өгч чадх. Жилин нег квартaлд эн кемжән һучн минһн арслнг тогтах. Хальмгин государственн университетд иим өөдән стипендь хойр зун көвүд-күүкд авч чадх. Академическ стипендь авчах баһчудын келсәр, иим сән стипендь авхд олз-туста болжана.
Нина Бегликова иим өөдән стипендь авчана. Ода тавдгч курст сурчана, иргчдән багшин эрдмтә болх. Сурһулин жилмүдт университетин олна бәәдл-жирһлд шунмһаһар орлцдг билә, волейбольн командын ханьд сәәнән наадж йовла, педагогическ отрядт вожатый чигн болж көдлв, номин конференцд шинжлт кеһәд орлцв, оютнрин театрт наадв. Ода хөрн зурһан минһн долан зун далн арслнг стипендь сән дөн болжана. Деед сурһулян төгсәчкәд, Нина аспирантурт сурх саната. Оютн Нина Бегликован келсәр, өдгә цагт сурһуль дасхд соньн болсн деерән, сән урмд өггднә. Тавдгч курсын оютнр бас иим стипендь авхар зүткжәнә. Тегәд чигн эдн зуг дөрвн болн тавн гидг темдг авх зурата.
Йилһән сәәнәр сурчах баһчудт немр һучн минһн арслнг стипендь өгчәхин тускар университетд цугтан тер дарунь медв. Болв иим өөдән стипендь авхин төлә авх баһчудын спискиг өрәл жил болад сольдгин тускар эдн меджәж уга. Ода болхла Хальмгин университетд Ока Городовиковин, Әрәсән президентин болн правительствин стипендь бәәхин тускар оютнр бас меддго бәәж. Сүл цагт оютнрт сурһульднь урмд өглһнә керг онц оньг тусхагджана. Педагогическ факультетин декан Зинаида Кекееван келсәр, иим керг ик чинртә төр болжана. Педагогическ эрдм-сурһулин болн биологин факультетин декан Зинаида Кекееван келсәр, давсн жилин декабрь сард сәәнәр сурдг оютнр ик мөнг авсмн. Иим зәнг талдан улст сән урмд өгчәнә. хамгин сәәнәр сурчах улст иим урмд авчана. Мана факультетд һучн дөрвн оют иим өөдән стипендь авсмн.
Эн өдрмүдт оютнр шүүврән өгчәх кемд, баһчуд эрк биш тавн гидг темдг авхар зүткжәнә. Дөрвдгч курсын оют , әрә Ангировин келсәр, греко-римск янзар бөк бәрлдлһнә спортд дурта. Университетин марһанд диилвр бәрж. Сурһулян сәәнәр сурсн бийнь, иим стипендь авад уга. Оют Василий Гегун келсәр, ода оют болһн сәәнәр сурхар зүткх. Өмнән иим күцл тәвәд, немр стипендь авхар шунх.
Әрәсән деед сурһулин стипендин санг хөрн процентд икдүлһнә туск правительствин тогтавр давсн жилин ноябрь сарас авн үүлджәнә. Иим стипендь авхин төлә тавн гидг темдг тәвн процент тогтах зөвтә, тер мет көвүд-күүкд талдан чигн халхар, тер тоод номин, үүдәлтин, спортын, олна көдлмшин халхст шунмһаһар орлцх зөвтә. Ода Хальмгин университетд иим тоод зун йирн тавн күн орв. Ода цуг оютнрас зуг арвн процентнь иим өөдән стипендь авчана. Болв сессь болһна хөөн иим оютнрин список шинрүлгдх зөвтә. Тегәд супер-стипендиг ода һурвн темдгәр сурчах абһчуд сәәнәр шүүврән өгхлә бас авч чадх. Тегд деед сурһульд сурчах баһчуд сурһулян сәәнәр сурхла, эдн хамгин сән оютнрин тоод орж чадх.
Колдан Наталья, Бадмаран Владислав
