Элст балһснд жанһрч болн дууч Дмитрий Шараевин концерт болв

Элст балһснд Дмитрий Шараевин концерт болв. Энүнә төлә байн хальмг келнә болн амн үгин зөөрин шишлнг программ белдгдв. Дууч хальмг улсин дуд, Жанһрин тасрха олна оньгт тусхав, домбар цокад цуглрсн әмтиг байрлулв. Соньн концертн программд баһ наста нертә артистнр Мергн Ким, Кутлан Мукубенов, Лиж Горяев болн талдан чигн үүлдәчнр орлцв.

Эн асхн Дмитрий Шараев олнд таасгдсн үүдәврмүд хәләһәчнрин оньгт тусхав. Тер мет концертин йовудт зурһан шин үүдәвр үзүлв. Эднә зәрмнь минь одахн үүдәгдж. Талдан дууг хальмг келнд орчулгдв. Дмитрий Шараевин келсәр, концертин программд соньн үүдәврмүд орв. Хальмг улсин алдр Жанһр дуулвр болхла мөнк зөөр болжана. Хурдн сарва ансамбль нөкд болв. Эн коллектив жил хооран тогтв. Тер мет бичкн цагтан дуулж йовсн шин дуд программд орулх зура бәәнә.

Дмитрий Шараевин хальмг келәр дуулсн орсин “Катюша” дууг хәләһәчнр икәр таасв. Дмитрий Шараев болн баһ наста артистнр дәкәд нег өвәрц белг эн асхн белдсн бәәж. Эдн нертә келн-улсин дууг өдгә цагин айлһар дуулж өгв.

Дмитрий Шараевин концертд баһ наста билгтнр орлцсн деерән, энүнә элгн-саднь бас нөкд болв. Хәләһәчнр дунд Шараевихна ик өрк-бүл концерт хәләв. Дмитрийн дү Бадм Мама нертә ду дуулв.

Келхд, эн өдр Дмитрий Шараев һарсн өдрән темдглв. Тегәд чигн цуглрсн әмтн энүг бүлүнән тосж кесгтән альх ташад, шуугж дөннв. Шараевин келсәр, хәләчнрт энүнә билг-эрдм таасгдхла, эннь хамгин сән белг болна. Иргчдән чигн билгтә артист Дмитрий Шараев мана танһчин, Әрәсән болн һазадын ордудын улсиг соньн үүдәврмүдәрн байрулх ицл бәәнә.

Азыда Надежда, Хулхачин Николай