Хальмгт арһлачнрин ниицәнә шин региональн әнг бүрдәгдв
Хальмг танһчд промышленникүдин болн предпринимательмудын ниицәнә Әрәсән олна организацин региональн әнг секгдв. Хальмг танһчин толһач Алексей Орловла болсн харһлтын йовудт ниицәнә вице-премьер Виктор Черепов темдглсәр, иим әнг ода далн негн регионд тогтв. Әрәсән социальн-экономическ делгрлтин кергт Хальмг танһч орлцхд иим әнг сән нилчән күргхмн. Танһчин толһачин, предприятьмудын болн профсоюзмудын хоорнд батлж авгдсн һурвн халхта зөвшәлт күцәхд бас эннь туслх. Тер тоод жалвин хамгин баһ кемжәг диглх, тарифн хәрлцәг шинрүлхд, улсин бәәдл-жирһл ясрулхд бас нөкд болх. Дәкәд болхла регионд инвестиц орулһнд организацин төсвс туслх зөвтә. Энүнә хөөн правительствин сүүрин залд Хальмгин региональн әнг секлһнә байр болн хальмг танһчин инвестицин төрмүдәр межрегиональн конференц болв. Энүнд бизнесин элчнр болн мана региона номин цутхлнгудын көдләчнр орлцв. Иим ниицәнә әнг мана танһчд бүрдәгдсн сән керг болжана гиж Алексйе Орлов темдглв. Энүнә тоолврар, иим организацин нилчәр, Хальмг танһчд арһлачнрин керг девшлт авх, экономикин халхар ик чинртә программ күцәж болх.
