Алексей Орловла болсн харһлтд баһчуд күцәмжиннь тускар келв
Хальмг танһчин толһач Алексей Орлов танһчин һардачин мөрән лауреатмудла харһлт кев. Энүнд орлцсн баһчуд эврәннь күцәмжин тускар келж өгв. Дәкәд нег тодлад келхлә, зурһан жил хооран билгтә баһчудыг дөннхин төлә келн-улсин программар иим мөрә тогтагдв. Ода энүнә кемжән арвн долан минһн арслнг тогтажана.
Харһлтд орлцсн баһчуд халун цә уув, әмтәхн хот-хол ширәд тәвгдж. Тер бийнь хальмг танһчин толһач ширә эргәд суухла, көвдү-күүкд үүмәд бәәв. Зуг күүндвр эклхлә, цаг яһж авсинь баһчуд медсн уга. Күр-күүндвр йир соньн болснас көлтә, темдглсн болзгас харһлт удан болв. Хальмг танһчин толһачин мөрә авсн сурһульчнр болн оютнр эврәннь күцәмжин тускар Алексей Орловд келж өгв. Дәкәд нег тодлад келхлә, иим мөрә сурһульч болһн авч чадх. Энүнә төлә танһчин эрдм-сурһулин министерствин марһана шүүврт орад, диилвр бәрх кергтә. Иим дөрлдәнд орлцсн көвүд-күүкд олн-зүсн халхар бәрсн үзмжин герчлһ үзүлх зөвтә. Хальмг танһчин эрдм-сурһулин, сойлын болн номин министерствин ах специалист Светлана Бадмаеван келсәр, хойр минһн зурһадгч жилд келн-улсин программар Әрәсән Президентин мөрәлә зерг, билгтә баһчудыг дөннхин төлә Хальмг танһчин толһачин мөрә бас тогтагдла. Эрдм-сурһулин болн сойлын халхар көвүд-күүкдиг дөннх санан бәәнә. Ода эн мөрә арвн долан минһн арслнгд күрв.
Школан төгсәжәсн кемд Нина Манджеева мөрән лауреат болв. Иим мөрә цааранднь сән урмд өгв гиж күүкн келнә. Тегәд чигн Нина арвн тавн деед сурһульд документан орулж өгч чадв. Ода болхла Өмн үзгин федеральн университетин дөрвдгч курсын оютн. Өдгә цагт хойр эрдмәр очн болн заочн әнгст сурчана. Дәкәд болхла, политологудын Әрәсән ниицәнә гешүн болв. Хальмг танһчин толһачин мөрәг Игорь Лазарев хамгин түрүн тоод авсмн. Энүнә хөөн талдан чигн олн күцәмжс бәрж чадв гиж Игорь келнә. Элстин искусствин училиш, Петр Чайковскийн нертә государственн консерваторь төгсәв, ода болхла Гнесиных нертә көгжмин академьд сурчана. Борис Покровскийн нертә көгжмин театрт дуулна.
Хальмг танһчин райодт билг-эрдмән үзүлх Игорин седвәриг Алексей Орлов дөннв. Элст балһснд болх Игорь Лазервин концертд орлцх үрвр танһчин толһачд кев. Дууч Игорь Лазаревин келсәр, арһ-чидләрн нег һазра улст дөн күргнә. Одахн искусствин училишлә хамдан хальмгин сойл болн зангшал делгрүлхин төлә Вдохновение нертә мөрә бүрдәв. Мөнгәр тетклһнә төриг эврән хаһлж.
Харһлтын йовудт Хальмг танһчин баһчудын хаһлх төрмдүәр күүндвр бас һарв. Тер тоод сурһулян төгсәсн баччудыг көдлмшәр тетклһнә, мана регионд жавлин бичкн кемжәнә тускар эдн ухан-тоолвран хувалцв. Эн учрар билгтә хальмгин көвүд-күүкд талдан регионмудт көдлхәр үлднә. Танһчин толһачин темдглсәр, эн төрмүд жил ирвәс хаһлгджана. Энүнә келсәр, жалвин дунд кемжән хөрн минһн арслнг күртл икдулгдхмн, шин ик предприятьмуд тосхгдснас иштә көдлмшин шин орм бүрдәгдх. Талдан нег төрнь — спортын делгрлт. Әмтн бәәдг гермүдин өөр спортивн плошадкс тосхгдх. Удл уга негдгч микрорайонд футбольн плошадк секгдх. Ода болхла көвүд цутхлнг стадионд наадж чаджана. Урлана һардврла кесн бооцаһар сурһульчнрин болн оютнрин командс энд өнгхр наадх. Тер мет харһлтд орлцсн улсин талдан чигн төрмүдиг халһхин тускар Алексей Орлов зәнглв. Алексей Орловин келсәр, билгтә болн зөрмг көвүд-күүкдлә харһад күүндхлә, мана бәәдл-жирһл сән болх гисн ухан орна. Ода мана танһчд сән болн ухата баһчуд дала, эннь мана сән иргч болжана.
Алексей Орловин болн көвүд-күүкдин темдглсәр, баһчуд мана иргч болжана. Тегәд эдниг олн-зүсн халхар дөннх кергтә. Хальмг танһчин болн Әрәсән һардврин тогтасн мөрә дорас өсж йовх баһчудт сән урмд өгнә. Болв эн туст баһчуд бас эврәннь седвәрән бәәдл-жирһлд тохрах зөвтә.
Татьяна Зубцова, Хулхачин Николай
