Хальмгин университетд негдгч курсын оютнр байр болв

Хальмгин университетд негдгч курсын оютнрин байр болв. Энүнд цуг факультетин оютнр цуглрв. Эдниг деед сурһулин һардачнр, багшнр йөрәв. Негдгч курсын цуг оютнрт шүүврин дегтр бәрүлж өгв. Ода деерән энүнд темдгүд уга. Удл уга баһчуд түрүн шүүврән өгәд, эврәннь дегтрән темдгүд тәвүлх.

Оютнр болн багшнр нег сардан көдлснә хөөн намрин ончта байр — негдгч курсын оютнрин нәр-наадн сән зангшалд тохрв. Сойлын герин концернт залд олн әмтн цуглрв. Негдгч курсын оютнриг йөрәхәр багшнр, баһчудын нәәжнрнь болн эк-эцкнрнь ирв. Алтана Бадаева болхла эн асхн һанцхарн нәр-нааднд ирв. Энүнә элгн-саднь болн эк-эцкнь Хар , азра района Комсомольский селәнд бәәнә. Тенд Алтана өсж-босад, дундын сурһуль төгсәсмн. Хальмгин университетин негдгч курсын оютн Алтана Бадеван келсәр, хальмгин университетд орхин төлә школд сурһулян сәәнәр сурв. Ода ик байрта бәәнәв. Деед сурһуль төгсәчкәд, дурта эрдмәрн көдлх саната.

Хальмгин университетин багшнр болн һардачнр деед срһульд шинкн орсн көвдү-күүкдт бүлән үгмүдән нерәдв. Зурһан жилин туршарт баһчуд энд медрл авад, специалистнр болж һарх. Негдгч курсын оютнрин байрин һол керг-үүлдвр эклв. Иргч специалистнр эврәннь эрдмдән церглх андһар өгв. Ода эн көвүд-күүкд деед сурһулин оютнрин ханьд орв.

Негдгч курсын оютнрин коллектив соньн концертн программ белдж. Энүнә төлә эдн багшнран болн хамдан сурчах баһчудыг байрлулхин төләд кесг цагтан тохнята белдвр кесмн. өдгәц агт Хальмгин деед сурһульд сурчах көвүд-күүкд сән медрл авсн деерән, үүдәгч билгән делгрүлх таал бүрдәгдв. Марһанд диилвр бәрсн оютнр күндлһнә дипломар ачлгдв. Тер мет ах курсын көвдү-күүкд бас мөрәлгдв. Сәәнәр сурһулян дасжахин төләд болн деед сурһулин номин халхд сән үзмж бәрсн ах курсын оютнрт Хальмгин университетин ректор эднд мөнгнә мөрә бәрүлж өгв. Иим кеәвр баһчудыг мөрәлснь негдгч курсын оютнрт сурһульднь ик урмд өгх зөвтә.

Санкун Кермн, Жамбин Дмитрий