Хальмг Танһчин келн-улсин музейд цаажла харһсн улст нерәдгдсн өвәрц һәәхүл секгдв

Хальмг Танһчин келн-улсин музейин әнгд цаажла харһсн улст нерәдгдсн өвәрц һәәхүл секгдв. Энүнд сталинск цаажла харһад, күзүцә зовлнг үзсн келн-улст нерәдгдсн үүдәврмүд үзж болх. Мана зәнгч Нәдвдә Тамара соньн зургудыг бас хәләж чадв.

Тер дөчн һурвдгч жилин декабрин догшн киитн өдриг Надежда Санджиева насни туршарт мартшго. Бу-селмтә салдснр, үрән теврсн уульжах экнр болн ут күнд хаалһ энүнә санлд мөнкинд һашута цаг гиж үлдв. Тер цагас кесг жил давсн бйинь, иим түрү йовдл зүркнәс һарчахш. Хол киитн Сиврт төрскн һазран санад кедү дәкж гейүртж уульсн болх.

Тегәд чигон зурачнр үэврәәнь үүдәврмүдән зурхларн, тер һашута цагиг киитн харнһу өнгтәһәр зургудан зурна. Һәәхүл хәләсн улсин тоолврар, хальмг улс үзсн күзүцә зовлнгиг ямаран чигн зургар үзүлж әмтнд күргж медүлдг арһ уга. Тер бийинь эн төрәр зурсн зургыдүг хәләхлә, Сиврт дааж һарсн зовлнг медгднә. Блицы 1 — баһ наста улст мана келн-улсин туужиг медх кергтә. 2 — , әәхүлд тәвгдсн зургуд хальмг улсин болн талдан чигн келн-улсин ик зовлнг үзүлжәнә.

Одахн мана танһчд цаажла харһсн улсин региональн фестиваль болв. Чеченск республикин элчнр иньглтин болн ик ханлтын темдг гиж мана танһчин келн-улсин музейд цаажин цагин тускар үүдәсн художественн бичкдүдин школмудын сурһульчнрин зургуд белглв. СНХ Һәәхүлин бүрдәһәч Виктория Босхаеван келсәр, иим зургуд хәләһәд, хальмгуд болн талдан чигн келн-улс тууврт ямаран зовлнг дааж һарсн тускар олн улс медж авна. Тегәд иим һәхүл бүрдәх кергтә болжана.

Ким Ольдаевин зурсн Пережитое, Враги народа, Виктор Ургадуловин үүдәсн Холодный декабрь, Очр Кекеевин Поезд мчится зург болн талдан чигн үүдәврмүд киитн Сиврт ик зовлнг дааһад һарсн болн тенд әмнәсн хаһцсн улсин күнд-түрү жирһл сәәнәр үзүлжәнә.