Давсн нарн өдр Әрәсән орн-нутгин хүүвин сунһвр болв. Хальмгин сунһчачнрин ик зунь Единая Россия партин тәлә дууһан өгв
Әрәсән орн-нутгин Хүүвин депутатнрин сунһвр болв. Ода сунһлһна протоколмудын йирн нәәмн процентнь тоолгдв. Урдаснь кесн то-дигәр, Хальмг Танһчд цуг сунһачнрас сунһврт жирн һурвн процентнь орлцв. Эс гиж зун һучн зурһан минһн һурвн зун һучн дөрвн күн дууһан өгв. Эннь күцц аш биш болжана. (Графика) Сүл то-дигәр, Единая Россия парть жирн зурһанас даву процент авв, КПРФ арвн нәәмн дундур, Справделивая Россия доланас даву процент авч, ЛДПР дөрвн процентас үлү, Яблоко парть болхла күсдундур процент авч чадв. Патриоты России болн Правое дело нег процентас баһ ду авцхав. Танһчин сунһлһна комиссин ахлач Александр Дикаловин келсәр, сунһврин ашт үлмә күргх зака эвдсн йовдл Хальмгт учрсн уга. Дәкәд нег тодлад келхлә, Әрәсән орн-нутгин Хүүвд хойр минһн доладгч жилд болсн сунһврт Хальмг Танһчин сунһачнрин далн хойр һар процентнь Единая Россия партин төлә дууһан өгсн билә. КПРФ тиигхд арвн негн һар процент авла, талдан партьмуд долан процентас баһар ду авсмн. Дөрвн жил хооран болсн сунһврт мана танһчин сунһачнрин жирн долан процентнь дууһан өгсн билә.
Давсн нарн өдр Элст балһснд өрүн нәәмн часас авн асхн хөрн час күртл тәвн сунһлһна участк көдлв. Ут-тоодан мана танһчд хойр зун тәвн һурвн участкд сунһвр болсмн. Түрүн болж КОИБ-ы -Хальмг Танһчд сунһлһна бюллетеньмуд тоолдг комплекс көдлв. Ут-тоодан иим арвн дөрвн комплекс йилһж өггдлә. Элст балһснд негн болн район болһнд нежәһәд комплекс углж тәвгдв. Мана танһчд яһж сунһвр болсна тускар мана зәнгч Ээнән Ольга келжәнә.
Өрүн эрт Хальмг танһчин толһач Алексей Орлов эврәннь авльтаһан Элстин лицейин герт көдлсн сунһлһна участкт ирәд, дууһан өгв. Дарунь бюллетень урнд тәвснә хөөн журналистнрин сурврмудт хәрү өгв. Энүнә келсәр Танчин улс дууһан өгч, иргчиннь тускар ухалжах темдг болжана.
Элстин бәәрн әмтн сунһврт шунмһа кевәр орлцжахин тускар Орн нутгин хүүвин депутатын кандидат Марина Мукабенова интервью өгсн саамдан темдглв. 12 часла участкт дууһан өгхәр ирсн кемд чеерүдт зогсх саам учрв.
Дигтә нәәмн часла Элстин 20-гч тойгта школд бәәршлжәх участкд КПРФ партин хальмгин әнгин һардач Николай Нуров ирж дууһан өгв.
Тер хоорнд ГАС сунһврин системин нилчәр кедү күн сунһврт орлцжахин түрүн диг-даран сунһллһна комиссьд орж ирнә. Үдин алднд ут-тоодан мана Танһчд 26 процент әмтн дууһан өгсн билә. Хар һазра болн Яшкулин райодын бәәрн улс сунһрт шунмаһар орлцжахан медулв.
Целинн района селәнә сойлын герт урн углгдж тәвгдв. Партин элчнрин бүртклһәр сунһврин йовудт зака эвдсн йовдл темглгдсн уга, района сунһврин участкин комиссин ахлач Анна Тимофееван келсәр энд төвкнүн бәәдлд әмтн ирж дүүһан өгв. Района администрацин герт бәәршлсн участкд сунһлһна бюллетеньмудыг тоолж авлһна өдгә цагин некврлә ирлцәтә комплекс КОИБ олзлгдсна ашт кедү күн дууһан өгсн то ахр цагин болзгт үзүлж һарһна. Сунһврин участкмудт инвалидмудин төлә шишлнг пандус углгдж тәвгдсмн, нүднә харань тату улст луп белдсмн. Пенсионерк Валентина Михайловна Тагееван келсәр герәсн холд йовдг арһ уга. Тегәд избиркомин элчнр гертнь урн авч ирәд, дууһан өгх таал учрав. Йириндән Целинн районд ут тоодан 20 минһн күн бәәнә. Урдаснь кесн то ди-дигәр 15 минһн сунһачнр сунһврт орлцх зөвтә. Декабрин 4-д үдлә района улсин 25 процентнь дууһан өгсн болж һарв.
