Хальмг танһчд киитрснәс көлтә цуг коммунальн церглтс чанһ дигтә-даратаһар көдлжәнә

Сүл цагт Хальмг танһчд антициклон ирсн бәәнә. Ода цуг коммунальн церглтс эндр чанһ дигтә-даратаһар көдлжәнә. Сөөннь дуусн хотл балһсна уульцнд цас хурадг машид көдлв. Ода деерән элвгәр цасн орад, техник цуг цасиг күцц хураж чаджахш. Ода деерән автобусмуд талдан регионмуд йовжана. Эндр үд күртл федеральн хаалһс секәтә бәәв.

Эн өдрмүдт хотл балһсна шишлнг эдл-ахун көдләчнр хаалһс мөстлһнә ноолда кежәнә. Эдн өдрин дуусн көдлжәнә, тер мет цөн бригадмуд сөөннь дуусн көдлв. Элстин шишлнг эдл-ахун ах инженер Эрдни Эльдяшевин келсәр, ода деерән зурһан машин көдлжәнә. Дәкәд дөрвн машин көдлх зөвтә. Хаалһсин зәрм бәәриг күрзәр цеврлх кергтә. Әмтн йовдг хаалһст элсн цацгджана.

Элстин маши залачнр сүл цагт икәр киитрсн таалд зөвәр түрдә бәәв. Эндр өрүн эдн машиһан ирәд хәләхлә, машиднь цасар даргдж, машина двигательнь көрсн бәәж. Тегәд чигн зәрм машидыг цаснас һарж авх кергтә болв. Машин әрә гиж көндрв. Өрүн эртәс авн халулх кергтә болв. Хаалһ мууһар үзгднә, цасн оржана.

Болв зәрм әмтнд иим тенгрин бәәдл таасгджана. Сөөһәр болн өрүн орсн цасн элстин зәрм улсиг байрлулв. Эн залу күүнә келсәр, ода йоста үвл ирв, зуг киитн болжана. Цанар дошж болх гиж эн медт тоолджана. Иим цасн ик кезәнәс авн орад уга гиж эн келв.

Автомобильн хаалһст болхла, шуурһн шуурад, хаалһ зуг зун метрт үзгджәнә. ГИБДД-н көдләчнрин зәнглсәр, ода деерән цуг федеральн хаалһс секәтә. Болв тенгрин бәәдл му болхла, зәрм хаалһ хаадгдад чигн бәәх. Тер саамд синоптикүдин тааврар иим киитн өдрмүд эн долан хонгин чилгч күртл тогтх. Эндр сөөһәр киитнә кежмән хөрн тавн градус күртл киитрх гиж синоптикүд таавр кежәнә. Эднә келсәр, цасн ордган уурх, зуг энүнә хөөн цааранднь чигн киитрх. Иим таалд хувцан дулалх кергтә.

Санкун Кермн, Очра Сергей