Хальмг танһчд гражданск харслтын сән өдр темдглв
Гражданск харслтын улд Әрәсәд аюлас гетлүлж, бачм чинртә йовдлмудла ноолда келһнә төлә келн-улсин систем бүрдәгдв. Эндр гражданск харслтын церглт бүрдснә далн йисн жилин өөн күцв. Әрәсән МЧС-ин министрин дарук Владимир Пучков журналистнрт зәнглсәр, шин систем гражданск харслтын социальн чинринь өөдлүлжәнә. Энүнә дөнгәр бачм чинртә йовдлмудын таалд келн-улсин заллтин цутхлнгин эв-арһ күцц олзлгдх.
Борис Николаев амрлһнд бәәх подполковник. Хөрн долан жилд Әрәсән цергт танкин эрдмәр церглв. Кесг ачлврар ачлгдсмн. Пенсьт һарсна хөөн МЧС-ин халхар көдлв. Ода эн церглтд арвн зурһан жилд көдлжәнә. Энд цергт цергснлә әдл болна гиж эн келнә. Гражданск харслтын керг-үүлдврмүд зуралһна болн бачм чинртә йовдлмудас гетлүлһнә әнгд көдлжәх Борис Николаев олн-зүсн документ белднә. Түрүн хәләцәр энүнә күцәсн көдлмш үзгдхш. Хальмг танһчар МЧС-ин заллтин әнгин ах специалист Борис Николаевин келсәр, мана белдсн документар зөв-йосна органмуд көдлнә. Тер тоод техническ әнгс, харсачнр болн түүмр унтрадг церглтин көдләчнр иим документ олзлна. Бачм чинртә йовдлмудт эдн ни-негн кевәр көдлх зөвтә.
Гражданск харслтын әнгд өдр болһн бачм чинртә йовдлмудт туссн улсиг харсж авлһан тускар көдлш күцәгджәнә. Эн кергт цаглань әмтнд иим аюлын тускар зәнглх төр ик чинр зүүжәнә. Әнгин ахлач Эрнжн Бараевин келсәр, ода Әрәсән зәрм регионмудт әмтнд цаглань кергтә зәнг өгдг цугәрәсән комплексн систем үүлджәнә. Мана танһчд болхла ода деерән иим систем уга. Энүг оурлхин төлә арвн долан сай асрлнг кергтә болжана. МЧС-ин заллтин әнгин һардач Эрнжн Бараевин келсәр, хальмг танһчд иим систем көдлхин төлә хойр минһн арвн һурвдгч жилд мөнгн йилһж өггдх зөвтә. Энүнд шин оборудовань олзлгдх. Иим эв-арһар олн әмтн бачм чинртә йовдлмудын тускар медж авх. Танһчин әмтн иим аюлын таалд ямаран үүлдвр күцәхин тускар зәнглгдх.
Эн жилин зунар МЧС-ин көдләчнр чанһ диг-даратаһар көдлв. Өдр болһн гилтә түүмр шатх әәмшгтә бәәдл шинжлх кергтә болв. Зәрмдән иим бәәдл хамгин ик тавчдгч классин бәәдл болж һарв. Тегәд чигн Хальмг танһчд бачм чинртә бәәдлин диг-даран кесг дәкд орулгдв. Тер мет царцаха бас ик боомтг учрав. Иргч жилд иим хортн ик һару һарһшгон төләд, селәнә эдл-ахун предприятьмуд оданас авн тәрәнә аһуһан хорлх зөвтә. Энүнә тускар МЧс-ин көдләчнр эдниг саглулжана. Тер мет МЧС-ин көдләчнр иим әәмшгтә бәәдлд бас белдвр кежәнә. Хальмг танһча МЧС-ин ахлачин дарук Андрей Тарасян келсәр, иргч жилд царцаха олар тархагдх һазрт шишлнг бүрдәц тогтах зура бәәнә. Иим отрядмуд болн экспедиц царцахала ноолда кехмн.
Эндр эрдмин сән өдрән МЧС-ин көдләчнр көдлмштән тосжана. Эднә көдлшөмт амрлһна өдр уга. Эдн оньдин саг бәәх зөвтә.
Татьяна Зубцова, Жамбин Дмитрий
