Алексей Орлов Нарьян-Мар балһснд болсн Әрәсән Государственн Хүүвин сүүрт орлцв
Эндр Нарьян-Мар балһснд Дмитрий Медведевин һардврта Әрәсән Федерацин Государственн Хүүвин президиумин сүүр болв. Энүнд Хальмг танһчин толһач Алексей Орлов орлцв. Сүүрт жилишн-коммунальн эдл-ахун төрмүдәр тодрха күүндвр болв. Тер мет Әрәсән президент Нарьян-Мар балһсна ЖКХ-н обьектмуд хәләв. Жилишн-коммунальн эдл-ахун төрмүдин туск күүндвриг президент давсн долан хонгт эклв. Эн төрәр Горки нертә резиденцд федеральн округст президентин күцц зөвтә элчнр орлцата селвлцән болв. Медведевин тоолврар, ода эн халхин хамгин дааврта көдлмшнь — үвлд сән белдвр келһн болжана. Давсн жилд эн халхар зәрм регионмудт күнд бәәдл тогтв гиж Медведев темдглв. Нидн жил цасн икәр орад, электрокүчнә сунһуг тасрв. Коммунальн халхин көдләчнр тер саамд сәәнәр көдлсн уга. Тегәд эн жил иим бәәдл тогтх зөв уга гиж президент келв.
