Эндр Әәдрхн балһснд художественн гимнастикин турнир төгсв
Эндр Әәдрхн балһснд художественн гимнастикин Өмн үзгин округин турнир төгсхв. Эн марһанд мана танһчин спорстменмүд призермудын тоод орна. Келхд, эн турнир жил болһн давулгдна, эн жил марһанд Әрәсән нәәмн региона элчнр дииләчән йилһжәнә.
Хальмгин команд тавн мячта болн обручта багин дасхлд хөрн балл хоршаһад, цаһан мөнгн медаль шүүж авв. Алтн медаль шүүж авхд зуг хойр очко дутв. Гимнастксин келсәр, невчк һундлта болв, ода эндүһән чиклх кергтә. Зөвәр икәр үүмәд бәәв. Талдан командс хәләһәд, дамшлт хоршав. Ростовин команд таасгдв. Оньдин иим марһана ашар дамшлт ирнә.
Келхд, эн күүкд һурвн жилдән командын ханьд дөрлджәнә. Оньдин нег-негән дөннә, командын ханьд дөрлдх дамшлт хоршажана. Эдниг эк-эцкнрнь дөннә, тегәд чигн эднә күүкд иим ке-сәәхн спортын хувцта. Иим хувц-хунр хулдж авхд үнтә болна. Ольга Краснокутская келсәр, иим костюм дегд үнтә. Болв бичкн күүкд иим спортын эрдмд йир дурта. Эк-эцкнр мөнг олж авна. Иим дөрлдәнд орлцжах гимнасткс спортын некврт ирлцх зөвтә.
Онц темдглхд, художественн гимнастикин Өмн үзгин федеральн округин марһан сүл арвн жил дарандан болжана. Арвн негн наста Анастасия Абаева иим дөрлдәнд кесг жилдән орлцжана. Долан жилдән иим ке-сәәхн спортар көдлжәнә. Күүкнә келсәр, гимнастикин секцд энүг экнь орулв. Анастасия Абаеван келсәр, өсхләрн тренер болх санатав. Бичкн спортсменмүдиг дасх зура бәәнә.
Әәдрхн балһснд болсн дөрлдән Әрәсән марһана шүүврин девснг болв. Хальмг танһчин гимнасткс ЮФО-н хамцу командын ханьд орж чадсн уга. Тер бийнь мана танһчин бичкн спортсменмүд иим дөрлдәнә йовудт сән дамшлт авцхав. Тренер Гайворонская келсәр, жил ирвәс иим спортан соньмсжах бичкдүдин то өсәд йовна. Художественн гимнастикин тренер Лариса Гайворонская келсәр, зәрм күүкд кесг жилдән гимнастикин секцд оржана. Эдн долан хонг зурһан өдр дөрвн-тавн частан секцд ирж көдлнә. Эдн эврәннь шүүж авсн спортд йир дурта. Иргч марһанд диилвр бәрх саната.
Эндр өдрәс авн гимнасткс эн жилин март сард Армавир балһснд болх марһанд экләд белдвр кежәнә.
Ээнән Делгр, Бадмаран Владислав
