Эндр хотл балһсна дәәнә ветеранмуд ЖКХ-н элчнрлә харһлт кев
Эндр Элст балһсна мэрийд дәәнә болн күч-көлснә ветеранмуд хотл балһсна жилишн-коммунальн церглтин элчнрлә харһад күүндв. Дәкәд нег тодлад келхлә, давсн жилин ноябрь сарас авн декабрь сар күртл балһсна әмтнд “Энергосервис” квитанц илгәсн билә. Энүнд туслжм кесг холванд өсж. Медәтә улс иим йовдлыг үүмәтәһәр тосв. Элстин һардачнр эн туст цәәлһвр өгхинь нексн билә. “Энергосервисин” директорин дарук Сергей Раровин келсәр, сүл жилмүдт олн давхрта гермүдин то-диг авдг прибормудын көдлмш теткжәсн коммерческ организацс дула өглһнә кемжә баһрулж. Тегәд чигн бәәрн улс дула олзлһна бичкн мөнг өгчәлә. Энүнәс иштә өрн баһрв. Иим кевәр туслмж күргжәх фирмс цаарандан көдлхәр седж. Иим прибормуд кеж һарһдг заводын шинжләчнрин иткүлсәр, то-диг өгдг эв-арһин тооцаг хажһр авснас көлтә һарутаһар көдлжәх Энергосервис улм ик сай өрнд унв.
