Эн өдрмүдт хальмг танһчд “Елк” нертә керг үүлдвр эклв

Шин жилин болн Рождественск байрин өдрмүдт хальмг танһчин түүмр унтралһна көдләчнр региона һурвн зун обьектмүдиг түүмрәс гетлхмн. Дигтә эн өдрмүдт “Елк” нертә керг үүлдвр эклжәнә. Энүнә йовудт хальмгин түүмр унтраһачнр обектмүдәр йовж бүртлһнә болн саглһна көдлмш давулжана.

Байрин өдрмүдт түүмр шатх гисн әәмшг икгднә. Хамгин түрүнд хальмгин түүмр унтраһачнр пиротехническ кегдлмүд хулгджасн болн хадһлгджасн бәәрнд бүртлһнә көдлмш күцәжәнә. Дәкәд болхла энүнд специалистнр кергтә цаасн бәәнү аль угай бүрткч хәләнә. Кергтә цаасн уга болхла тиим кегдлмүд хулдж болшго. Тиим кегдлмүдиг кергтә һазрт хулдх зөвтә.

Хальмг Танһчин МЧС-ин специалистнрин келсәр жил болһн кесг әмтн пиротехническ кегдмүдән энд тенд хулдна. Эннь буру йовдл тер юнгад гихлә шишлн ормд хулдад дәкәд кергтә цааста болх зөвтә — гиж Сергей Коробейников келв.

Келхд, пиротехническ кегдлмүд хулдж авсн әмтн саг бәәх зөвтә. Тиим кегдлмүд хулдж авхларн хамгин түрүнд цааснь умш ад эдлж чаджана. Бичснь үгмүднь орс келәр болх зөвтә. Эн кегдл хуучн аль угай бас хәләх кергтә. Кергтә цаасн уга болхла хулдачнр худл чигн келәд таниг меклж чаджана.

“Елк” нертә керг үүлдвр эклсн гисн зәнгиг хулдачнр сонсчкад эврәннь кегдлмүдән бултулчкна — гиж МЧС ин специалист Сергей Коробейников маднд келж өгв.

Энүнә келсәр худл пиротехническ кегдлмүд хулдж авсн улс ик зуудан олзлларн шавтна. Байрин өдрмүдт кесг әмтн больницд орулгдна.

Пиротехническ кегдлмүд шишлн магазинмүдт хулдж авх кергтә. Тиим магазинмүд шишлн цааста болна. Мана өгсн сүв селвгәр бәәхлә тана байрин өдрмүд байрта кевәр давх гиж бидн нәәлвртә бәәнәвидн.

Бевина Мергн, Хулхачин Николай