Элстин сурһульчнрт орсин драмин театрт шишлнг экскурсь бүрдәгдв
Театрин артистнр уйн наста хәләһәчнрт эврәннь үүдәлтин нуувчин тускар келж өгв. Элстин сурһульчнрин төлә орсин драмин театрт шишлнг экскурсь кегдв. Нааран ирсн көвүд-күүкд артистнр нааднд белддг хораст, сценическ хувц-хунр бәәдг хорад болн талдан чигн дөнцл хора тер тоод сцен хәләв.
Арвн наста Заяна Кукаева түрүн болж орсин драмин театрт ирв. Ирсн даруһан олн хәләһәчнр үздго тоот һәәхв. Заяна келсәр, театрин сцен ямаран болдгин тускар, актермуд нааднд яһж белдгин тускар медж авх саната бәәж.
Ода Заяна болн энүнлә хамдан сурчасн көвүд-күүкд артистнрин хувц-хунр альд хадһлгджасинь, яһж артиснр наадна өмн бийән белдгин тускар сәәнәр медж авв. Эднәс ик зунь урднь театрт одла, болв эдн зуг хәләһәчнр болж театрт наад хәләхәр одна. Ода болхла эдн олн тоот медж авч. Минь ода театрт одад, наад хәләх дурн күрв. Хамгин икәр артистнрин хувц-хунр таасгдв. Тенд олн сценическ хувцн бәәнә. Актермуд наадна өмн бийән белддг хора таасгдв. Тенд олн-зүсн кеерүл бәәнә.
Багшнрин келсәр, иим экскурсин йовудт театр яһж көдлдгин тускар бичкдүд медж авна. Нег наад тәвхин төлә кедү көдлмш кехин тускар, нег нааднд кедү артистнр орлцдгин тускар сурһульчнр сәәнәр медв. Элстин һурвдгч школын эклц классин багш Элеонора Эдлякиеван келсәр, театрт бичкдүд хәләһәчнр биш, орсин театрт экскурсьт одхин тускар сонсчкад, икәр байрлв. Кулисин ард орж хәләж болхий гиж эдн сурвр өгв. Энүнә тускар сурһульчнр хоорндан удан күүндв. Театрт одад соньн экскурсь кех зәнгиг ик байртаһар тосв.
Күн болһнд театрт түрүн болж одхла йир соньн болна. Нег үлү бичкдүд иим экскурсь кехләрн, өсхләрн зәрмнь артистын эрдм шүүж авч чадх. Орсин театрин һардач Валерий Хотлин бас иигж тоолжана. Бичкнәсн авн театрт оддг бәәсмн. Тегәд дорас өсж йовх бичкдүд иим наснас авн театральн эрдмлә өөрхн таньлдхла, эдн иим үүдәлт шүүж авч чадх. Орсин театрин һардач Валерий Хотлина келсәр, бичкн цагасн авн көвүд-күүкд театрт одхла, өсхләрн иим экрдм шүүж авх. Танһчин цуг әмтнд, тер тоод селәнә улст сойлла таньлдулх арһ өгх кергтә.
Театрт экскурсь бүрдәлһн эрдм-сурһулин программин нег әнгнь болжана. Иим кевәр эдн олн келн-улсин сойлла, зангшалла өөрхн таньлдна. Нег үлү, бичкдүд театрт дуран өгхнь лавта.
Ээнән Делгр, Колдан Церн
