Хальмг танһчд социальн дөн күрглһнә цутхлнгд дөн көдлжәнә
Өрк-бүлд күнд зангта бичкдүдтә эк-эцкнр социальн дөн күрглһнә цутхлнгд дөн авч чадх. Хальмг танһчд иим цутхлнг Хальмг танһчд иим цутхлнг цөн жил хооран секгдв. Эн организацин специалистнрин келсәр, эднә көдлмшин сән аш бәәнә. Хальмг танһчин зәрм улс итклин телефо олзлад, дөн авна.
Психологин кабинетд ирсн әмтн күүндврт орлцна. Иим специалист улст социальн тетквр кедг комплексн танһчин цутхлнгд хойр жилдән көдлжәнә. Нааран бичкдүд болн эднә эк-эцкнр дөн авхар ирнә. Иим әмтн нурһлж жирһлин күнд-түрү бәәлд тусад, нөкд болхинь хәәнә. Өдр болһн цутхлнгин специалистнр ирсн улсиг болһамжтаһар сонсад, түрү бәәдләс яһж һархин тускар келж өгнә. Зәрмдән әмтн иим күнд-түрү бәәдләс эврән һарч чадхш. Танһчин цутхлнгин багш-психолог Лариса Харликован келсәр, нурһлж нааран баһчуд ирәд, талдан баһчудла кедг хәрлцәнә тускар сурна. Тер тоод көвүд болн күүкд хоорндк хәрлцән эдниг үүмүлнә. Зәрмдән баһчуд иим төрәр эврәннь эк-эцкнртәһән күүндхдән эмәнә.
Зәрмдән түрү бәәдлд туссн улсиг зуг сәәнәр сонсад, нөкд болж болх. Зәрмдән элстихн эврәннь хаһлх төрин тускар итклин телефоһар жиннүләд, специалистнрас дөн күләнә. Иим күн тана төриг сонсад, тана төрин тускар тодрхаһар күүнднә. Цутхлнгд өдр болһн 4-10-00 болн 8 800 2000 122 итклин телефон өрүн нәәмн часас авн арвн долан час күртл көдлнә. Тегәд чигн иим телефоһар өдрин дуусн әмтн жиннүлнә. Цутхлнгин һардач Светлан Роман келсәр, итклин телефон оруслн хөөн, олн әмтн жиннүлдг болв. Өдгә цагт иим дөн әмтнд кергтә. Специалистнр күн болһнд дөн күргхәр зүткнә. Иим хурц төрмүдиг баһчуд эврән психологуд угаһар зәрмдән хаһлж чадхш.
Сүл цагт психологудла харһад күүндх таал учрв. Өдр болһн цутхлнгд әмтн дала. Давсн жилд нааран хойр минһн күн ирәд, дөн авсмн. Психологин кергтә дөн авх Хальмг танһчин болн Элст балһсна улсин то жил ирәвс өсжәх герч эннь болжана. Специалистнрин тоолврар, иим йовдл сән болжана. Олн әмтн эврәннь күнд төрән специалистнрин дөнгәр хаһлхар зүткжәнә. Удл уга итклин телефон өдр-сө уга көдлх. Цутхлнгин мобильн бригадмуд болхла, шишлнг туслжм күргхин төлә Хальмгин селәдт одна. Тегәд иим дөн күнд бәәдлд туссн бичкдүдт, баһчудт болн бөдүн улст эрк биш кергтә болна.
Хавтхна Элла, Хулхачин Николай
