Элстд бичкдүдин садмуд ясгджана

Урднь бичкдүдин садмуд бәәсн гермүдиг дәкнәс дошкольн систмед хәрү өгчәнә. Иим кевәр дошкольн учрежденьс дутжах хурц төриг хаһлх зура бәәнә. Эн жил Элтс балһсна администрац немр тавн зун орм секх саната. Ода бичкдүдин садт орхин төлә нәәмн минһн бичкн көвүн-күүкн чеерүдт зогсжана.

“Белочка” нертә бичкдүдин садт шинрүлж яслһна көдлмш эн жилин апрель сард эклсмн. Урднь эн гер бичкдүдин поликлиник бәәсмн. Ода хуучн гер цуг ясврин көдлмш СанПиНа цуг некврмүдәр кегджәнә. Тосхлытн ясврин көдлмш күцәхин төлә хотл балһсна бюджетас арвн дөрвн сай арслнг йилһж өггдв.

Элст балһсна тосхлтын заллтин директор Мергн Домбриновин келсәр, ода темдглсн зураһар көдлмш кегджәнә. Тосхачнр шалдарин сүл көдлмш күцәжәнә. Энүнә хөөн садын герин аһу кеерүлһнә көдлмш кегдх. Хаша хаац бәргдх. Августын нег шин күртл цуг темдглсн көдлмш төгсх зөвтә. гер хуучн. Тегәд энүг сәәнәр тосхачнр шинжлж хәләв. Энүнд зуг шин тосхлтын материалмуд олзлгджана.

Йирдгч жилмүдт нилх баһар төрснәс көлтә Элст балсһан зәрм бичкдүдин садмуд хаагдв гиж специлистнр келнә. Тегәд энүнә гермүдиг эзнә һарт хулдв эс гиж нәәмәдлһнд өгсмн. Ода болхла бичкдүдин садмуди ки чеерүд хурснас көлтә, бчикдүдин садмудын гермүдиг хәрү дошкольн эрдм-сурһулин системд өгх шииидвр Элст балһсна һардачнр батлж авв. Эн хурц төр хаһлһна нег шиидвр болжана. Ода садын гер шинрүлж яслһна көдлмш төгсжәнә. Садын һардач Лидия Хазыкован келсәр, бичкдүдт энд цуг кергтә таал бүрдәгдх.

“Белочка” нертә бичкдүдин садын һардач Лидия Хазыкован келсәр, садын герт дулан пол делггдв, пластикин шин терз тәвгдж. Халун усн иржәнә. Хот кедг хорад аһар цеврлһнә систем бәәнә. Медицинск хора секгдх. Энүнд изолятро көдлх, процедурн кабинет бәәнә.

“Белочка” нертә бичкдүдин садт орх көвүд-күүкдин то дегд ик. Эн дошкольн учреждень хотл балһсна цутхлнгд бәәхнь эк-эцкнрт таасгджана. Ода нааран орх көвүд-күүкдин то бүрткжәнә. Багшнр болхла дошкольникүдин төлә сурһулин программ белджәнә.

Садын һардач Лидий Хазыкован келсәр, ода эрдм-сурһулин программ белдж авчана. Тер мет бичкдүдин садын делгрлтин тавн жилин зура бас темглж авгджана. Садт дөрвн баг секгдх, хойр ах наста көвүд-күүкдин болн хойр бичкн наста бичкдүдин баг секгдх. Ут-тоодан йирн орм бәәнә.

Тер мет ода Элст балһснд Изотовин нертә уульнцд бәәсн эклц школын гер бичкдүдин садт хүврүлгджәнә. Эн жил садмудт немр тавн зун орм секх зура бәәнә. Әрәсән Президентин тәвсн зура халһгджана гиж келж болжана.

Ээнән Ольга, Бадмаран Владислав