Алвна туслжмиг электронн эв-арһар авч болх
Июлин дөрвнәс авн Хальмг танһчд юридическ улсиг болн арһлачнриг темдглж бичлһнә документиг шин янз олзлгдх. Шин бланкмудын янз онц штрих-кодта болх, энүг ахр цагт электронн эв-арһ орулж болх. Энүнә тускар ирлцнһү сольвр Әрәсән правительствин шиидврт кегдв.
Өдгә цагт юридическ улсиг темдглж бичлһнә керг жанһрта болн оралһата. Болв иргч долан хонгас авн шинрүлгдсн зокал орулгджана. Документмудын шин янз эврә онц штрих-коддта болх. Энүнә дөнгәр ахр болзгт электронн эв-арһ олзлж болжана. Шин бланкмудын дунд юридическ улсиг үбрдәлһнә цагт государственн темдглж бичлһнә эрлһн, реорганизацин кевәр бүрдәгджәх юридическ улсиг государственн темдглж бичлһнә туск эрлһн, реорганизацин керг эклснә туск герчлһн болн талдан чигн бланкмуд орулгджана. Дәкәд болхла, Әрәсән юстицин министерстин закврас иштә некоммерческ организацсиг темдглж бичлһнд юридическ улсиг темдглж бичлһнә төлә алвна органмудт орулж өгх документмудын шин янз олзлгдхмн.
Хальмг танһчар Әрәсән федеральн алвна церглтин заллтин әнгин ахалч Гиляна Васляеван келсәр, урднь мана документмудын янз иим билә. Энүнд олн улс дасчкв. Июлин дөрвнәс авн документмудын янз невчк сольгдх. Эдн иим бәәдлтә болх. Оньган өгтн, шин янзд штрих-код бәәнә. Шин янз соцальн чинртә. Документмуд хуучн янзар июлин һурвн күртл авгдх. Июлин дөрвнәс авн документмуд шин янзар орулж өгч болжана.
Өдгә цагт улст государственн туслмж күрглһнә туст чинр өөддлүлһнә болн ахр болзгт темглж бичлһнә халхд өдгә цагин некврлә ирлцәтә зәнглһнә эв-арһ олзлһан болн цуг государственн тусмлжиг электронн эв-арһар өглһнә төр ик чинр зүүжәнә. Электронн эв-арһ олзлж чадх ведомствс дунд алвна церглт хамгин сәәнәр белдсн ведомств болжана. Ода иим эв-арһиг эдн әмтнд государственн туслмж күрглһнә халхар олзлжана.
Алвна церглтин әнгин ахлач Гиляна Васляеван келсәр, алвна церглтин сайдт орхла, энүнд кергтә зәнг олж авч болх. Шин зәнгсин әнгд документмудын шин янзин тускар тодрхаһар бичгдлә.
Ода танһчин әмтнд алвна церглтд одлго, интернетар дамжулад кергтә цаасан һарһулж авч чаджана. Ода деерән әмтн хамгин олар эврәннь өрин утскар медж авчана. Тер мет эдн мөнг өгх даалһврин цаас болн гсоударственн пошлин өглһнә цаас олар авчана. Алв өгчәх улсин келсәр, эндр өдрт иим эв-арһ государственн туслмж күрглһнә туст хамгин эвтә эв-арһ болжана.
Елена Патерикина келсәр, ода эвтә болв. Чеерүдт удан зогсх керг уга. Сайтд олн-зүсн зәнг һарч ирв. Ода электронн эв-арһар эрл орулж өгәд, кергтә цаас авч болх. Эврәннь өрин тускар медж болна. Әмтнә цаг әрвлгджәнә.
Өдгә цагт Хальмгин алвна церглт электронн эв-арһар һучн государственн туслмж әмтнд күргжәнә. Жил ирвәс эднә то өсх. Энүнә нилчән зәнг ахр болзгт чеерүд угаһар авч болх, алвна органмудла хәрләц бәрхд амр болх.
Бевина Мергн, Хавтхна Анатолий
