Элстд бичкдүдин садмуд эдлврт орулгдх

Элст балһснд эн жил шин бичкдүдин садмуд эдлврт орулгдх. Энүнә төлә дөчн сай арслнг йилһж өггдв. Эннь федеральн хазнас ирсн бюджетн кредитын мөнгн гиж мэрийн һардачнр зәнглв. Урднь бичкдүдин поликлиник бәәсн герт ода капитальн ясврин көдлмш кегджәнә. Баһ Дөрвд селәнд болхла дошкольн учрежденя нерт ясврин көдлмш төгсхдән өөрхн.

Советин йосна цагт эн герт бичкдүдин сад бәәршлжәсмн. Йирдгч жилмүдт дошкольн учреждениг уга кеһәд, эднә гериг искусствин школд өгсн бәәж. Школ болхла зуг герин өрәлинь эзлв. Жил ирвәс бичкдүдин садмудт орх көвүд-күүкдин то өсәд йовна, чеерүд баһржахш. Болв тер цагт района һардачнр эн хурц төриг хаһлхар адһсн уга. Зуг хойр минһн арвн негдгч жилд районд Хальмг танючин толһач Алексей Орлов көдлмшин кергәр ирсн хөөн, эн төр дор ормас көндрв.

Баһ Дөрвдә РМО-н администрацин толһач Геннадий Золочевский келсәр, проектн-сметн документац батлж авсна хөөн, мөнгәр тетклһнә төр хаһлсна хөөн, давсн жилин декабрь сард энд шинрүлһнә көдлмш эклв. Энүнә төлә хойр минһн арвн хойрдгч жилд бюджетн кредит авх кергтә болв.

Тер цагас авн тавн шаху сар болв. Подрядн организацин элчнрин келсәр, эндр өдрт ясврин көдлмш найн процентд күцәгдв. Нег үлү, капитальн ясврин көдлмшлә зерг талдан чигн төрмүд хаһлх кергтә болв. Үлгүрнь, дула өглһнә систем болн электрокүчнә залһлдан сольгдв. Тегәд ода немр мөнг хәәж авх кергтә. Танһчин толһач муниципалитетд мөнгнә дөн күргх саната. Хальмгин толһач Алексей Орловин келсәр, цуг халхаснь нөкд болх зура бәәнә. Шин мебельхулдж авх, шин терз тәвх кергтә. Тосхачнр сәәнәр көдлжәнә. Сентябрин нег шинд көвүд-күүкд шин садт орж чадх.

Сентябрин нег шин күртл Элст балһснд шин дошкольн учрежденьс эдлврт орулх зура бәәнә. Эднә негнднь Хониновин уульнцд бәәх герт урднь бичкдүдин поликлиникин филиал көдлжәсмн. Ода энд ясврин көдмш эклв. Пол болн эрс сольсна хөөн, тосхачнр ясврин һол көдлмш экләд күцәх.

Элстин арвн һурвдгч тойгта бичкдүдин садын һардач Лидия Хазыкован келсәр, шинрүлгдсн садт цугнь тас талдан болх. медицинск хора көдлх, хот-хол хадһлдг хора бәәнә, хот кедг шин бәәрн бас бәәнә.

Садын һардач Лидия Хазыкован келсәр, бичкдүдин садт йирн көвүд-күүкд орж чадх. Болв нааран орх бичкдүдин то зу һар болжана. Тер мет хотл балсһна һардачнр талдан чигн обьектмудыг чанһ бүртклһнд авла.

Элст балһсна эрдм-сурһулин заллтин әнгин ахлач Наталья Бютцинован келсәр, эн жил энүнәс талдан дөрвн обьектд шинрүлһнә көдлмш кегдх. Тер тоод Изотовин уульнцд дошкольн учрежденя филиалд ясвр кегдх, Хөрн негдгч сад шинрүлгдх. Урднь бичкдүдин герт бас сад көдлх.

Хотл балһсна эрдм-сурһулин заллтин көдләчнрин келсәр, Элст балһснд шин садмуд сексн деерән, хучн гермүд шинрүлсн деерән, эзнә бичкдүдин садмудт дөн күрггдх. Тер мет эн төр хаһлх талдан чигн шиидвр бәәнә.

Эн жилин сентябрь сард Элст балһсна зурһан зун көвүд-күүкд бичкүдин садмудт орж чадх.

Чучян Валентина, Бадмаран Владислав