Элст балһсна зәрм садмудт ясврин көдлмш төгсв

Дошкольн учрежденьст ямаран ясврин көдмлш кегдсиг межведомсвтенн комиссь бүрткж хәләх. Элст балһсна зәрм садмудт ясврин көдлмш төгсв, талдан учрежденьст болхла иим көдлмш кех зура бәәнә. Хотл балһсна мэрий эн халхар зура батлж авв. Эн зураһар дошкольн болн дунд сурһулин заведеньст бичкдүдин немр багмуд тогтагдхмн. Өдгә цагт Элст балһснд иим төр хурц кергт хүврв. Эндр өдрт тавн минһн бичкдүд садт орх чеерүдән күләжәнә.

Элст балһсна хөрн зурһадгч тойгта бичкдүдин садт ясвр кехин өмн хамгин түрүнд күцәх көдлмшин зура батлж авч. Энд иргчдән немр баг көдлх гиж зуралгдад, иим бәәдл тоод авгдж ясвр кегджәнә. Эн хорад зурлһна студь көдлх. Октябрь сард нааран ахр болзгт бичкн көвүд-күүкд ирж чадх. Элстин хөрн зурһадгч садын һардач Ольга Плугина келсәр, иим кевәр садын герин хорас олз-тустаһар олзлгдж чадх. Өрәл өдр үд күртл энд зурлһна студь үүлдхмн, эднә хөөн бичкдүд ахр болзгт садт орж чадх.

Тегәд зурлһна хораг талдан һазрт орулад, нег баг орх хора сулдхв. Бәәцин болн сурлһна цуг таал бүрдәһәд, март сард чеерүдт зогсжасн бичкдүдиг нааран орулж авла. Хөрн зурһадчг садын һардач Ольга Плугина келсәр, федеральн программар шин мебель хулдж авгдв. Бичкдүд унтдг орн, сән чинртә ширә бас бәәнә. Иим меьель бичкдүдт эрк биш кергтә болжана.

Эн хурц төриг хаһлхин төлә ода хотл балсһна талдан чигн дошкольн учрежденьс ирлцнһү көдлмш күцәжәнә. Нег жилин эргцд немр һурвн зун орм һарһгдв. Энүнә тускар Элст балһсна мэрийн эрдм-сурһулин заллтин әнгин ахлач Наталья Бютцинова келнә. Иим немр орм нурһлж школд удл уга орх көвүд-күүкдт йилһж өггдсмн. Тер мет иим хурц төр хаһлхин туст арвн доладгч сад секлһн бас сән нилчән күргв. Эн халхар көдлмш цаарандан кегдх.

Эн туст муниципалитетмудт процет угаһар өгья мөнгн өгх шиидвр Әрәсән правительств батлж авсмн. Элст балһснд нег сай арслнг йилһж өггдх. Элстин мэрийн эрдм-сурһулин заллтин әнгин ахлач Наталья Бютцинован келсәр, ода арвн һурдгч садыг хәрү эврәннь медлд орулж авх төр хаһлгджана. Ода йисдгч садын филиалд ясврин көдлмш кегджәнә. Изтовин нертә негдгч тойгта школ бас шинрүлгджәнә. Хөрн һурвдгч школд дошкольн хойр баг көдлх. Тер мет урднь дошкольн учрежденьс бәәсн муниципальн зөөриг хәрү өгхин туск төриг хальмгин правительств хаһлх гиж нәәлжәнәвидн гиж Бютцинова келнә.

Тер саамд ода элстин бичкдүдин садмудын гермүдт ясврин көдмш гүргүдән. Урдаснь темдглсн авсн болзгар, дошкольн һурвн учрежденьд ясврин көдлмш төгсв. Дөрвн садт болхла иим көдлмш төгсж йовна. Сентябрь сар күртл хотл балһсна талдан цуг садмудт иим ясврин көдлмш күцц төгсх зөвтә.

Дәкәд болхла, һурвдгч тойгта садын герин ора эн жил шинрүлж ясгдх гиж зуралгджана. Энүнә өмн йилһж өгсн мөнгәр шин оборудовань хулдж авгдв. Элст балһсна һурвгч садын һардач Елена Оргадыкован келсәр, июлин арвн зурһанд шинрүлгдсн садт көвүд-күүкд ирж чадх. Энд үвлин кемд дулан болх, ода болхла сарул цевр-цер болв.

Хотл балһсна бичкдүдин садмудт кеж-күцәсн көдлмшиг межведомственн комиссь август сард бүрткж хәләх.

Чучян Валентина, Жамбин Дмитрий