Элст балһсна муниципалитет керамическ тоосх кеж һарһдг заводын тосхлтын төсв Москвад болсн форумд үзүлв
Москва балһснд болсн дөрвдгч келн-улсин инвестиционн форумд Элст балһсна мэрийн төсв алтн медаль шүүж авв. Эн керг-үүлдврин һол күцлнь — өдгә цагин шин предприять тосхж, көдлмшч орм бүрдәлһнә төлә государствин, онц улсин болн һазадын ордудын инвестиц хәәж олж авлһна төр болжана. Хотл балһсна муниципалитет керамическ тоосх кеж һарһдг заводын тосхлтын төсв үзүлв.
Урдаснь кесн то-дигәр шин предприять көдлхлә, олн-зүсн бюджетмудт алвна кемжән дөрвн сай арслнг тогтах. Тер мет олн әмтн көдлмшт орж чадх. Элст балһсна муниципалитетын зәнглсәр, шин завод бәрхин төлә хойр зун сай арслнг кергтә болжана. Элст балһсна мэрийн экономикин әнгин ахлач Ираида Корнееван келсәр, иим төсв белдх севдәр Элстин тоосхин завод оурлж өгв. Эн төсв Элст балһсна социальн-экономическ делгрлтин программд орв. Энүг бидн сәәнәр шинжлж хәләвидн. Олз-туста керг. Тегәд чигн алтн медаль шүүж авв. Ода инвестормудыг күләжәнәвидн.
Шин төсв хуучн тоосхин заводын улд секгдх зурата. Хуучн зхавод кесг жилдән көдлжәнә. Энд көдлжәх оборудовань ик кезәнә хуучрв. Тер мет баһ наста специалистнр дутжана. Хуучн оборудовань эвдрнә. Тегәд зәрм көдлмшиг һарарн кех кергтә болна. Тегәд өдгә цагин некврлә ирлцәтә завод тосхх төр тәвгджәнә. Иим предприять сән чинртә тоосх кеж һарһж чадх, энүнд шин эв-арһ олзлж көдлж болх. Ода хуучн завод жилдән зуг хойр сай тоосх кеж һарһна. Шин предприять инвестицин дөнгәр хйор жилин туршарт эдлврт орулх зура бәәнә. Иим шин завод көдлхлә, танһчин тосхлтын халхд ик дөн күрггдх. Дәкәд болхла хальмгт хуучн нурад унжах гермүдәс әмт нүүлһхин төлә шин гермүд бәрж болх.
Элст балһсна тоосхин заводын элч Славий Каминовин келсәр, мана завод кесг жилдән эгл тоосх кеж һарһдг билә. Мана продукциг әмтн дурлж хулдж авна. Гермүдин ул талдан чигн дөнцл көдлмшт олзлгдна. Ода мана танһчд талдан һазрас сән чинртә тоосх авч иргднә. Шин заводт бидн иим тоосх кеж чадхивдн. Мана продукц сән чинртә болх зөвтә. Талын һазрас авч ирсн тоосхас невчк кимд болх.
Өдгә цагт тосхлтын шин эв-арһ олзлад, тас талдан тоосх кеж һарһдг болв чигн, эгл керамическ тоосх тосхлтд кергтә болна. Иим тоосх бат болн удан олзлгдна. Тегәд энүнә өрмд талдан тоосх өөрхн иргчд кегдшго. Шин заводын продукциг әмтн сәәнәр хулдж авх зөвтә.
Бевина Мергн, Дукмана Николай
