Элстд болсн субботникд элстихн Иньглт паркин аһу цеврлж, урһа модн болн шагшгуд тәргдв

Давсн амрлһна өдрмүдт субботник болв. Энүнд Элст балһсна бәәрн улс орлцв. Эн өдр элстихн Иньглт паркин аһу цеврлж, хог бог зөөж һарв, Молодежный нертә микрорайонд болн Колонск боодгин өөр урһа модн болн шагшгуд тәргдв. Эн өдрмүдт эн көдлмш цаарандан кегджәнә.

Элст балһснд урһа мод тәрлһнә кем эклв. Нег сарин эргцд Элстин Арбат, Колнск боодгин өөр болн хотл балһснд ар үзгәс орж ирдг һазрт мана танһчин тенгрин бәәдлд ирлцәтә тавн минһн олн-зүсн урһа модн тәргдх. “Горзеленхозин” ах агроном Николай Балиевин келсәр, ода урһа мод болн шагшгуд суулһхин төлә ода хойр дундур минһн нүкн малтж белдгдв. Николай Балиевин келсәр, хәләтн энд монһл һазр, тегәд сән чинртә һазр деернь немжәнәвидн.

Сүл өдрмүдт бамб цецгин эк тәрәд төгсәв. Элст балһснд цецгүд тәрдг Светлана Борлыкова болн Ольга Казачкина эн көдлмшиг йир сәәнәр медж күцәнә. "Городское зеленое хозяйство" нертә предприятин көдләч Светлана Борлыкован келсәр, темдглсн зураһар көдлжәнәвидн. Цуг көдлмшиг цаглань күцәхвидн. Эн предприятин көдләч Ольга Казачкина темдглсәр, кемр тенгрин бәәдл сән болхла цуг даалһвриг цаглань күцәх арһ бәәнә. Хотл балһсан кеерүлх санатаһар көдлжәнәвидн.

Октябрь сард болсн түрүн субботникин йовудт Иньглт паркд эргндк аһу цеврлгдәд, хог-бог зөөж һарһгдв. Энүнд хотл балһсна олн әмтн ирж көдлв. Субботникд Элст балһсна предприятьмудын болн организацсин көдләчнр, деед болн дунд сурһулин заведеньсин оютнр шунмһаһар орлцв. “Городское зеленое хозяйство” предпряитин ах агроном Николай Балиевин келсәр, ода тәрсн урһа модн сәәнәр үвлзхин төлә сән хәләвр кех зура бәәнә. Кергтә бордвр өгчәнәвидн, талдан чигн эв-арһ олзлз кергтә.

Ода деерән цецгүд болн урһа мод тәрсн улсин көдлмшиг үнлж болшго. Үвлин кемд суулһсн урһа модн болн цецгүдин экн батрад, иргч хаврт цецгәрхмн. Тиигхлә эн предпряитин көдлмш ил болх. Эднә нилчәр Элст балһсн улм кеерж сәәхрх зөвтә.

Санкун Кермн, Колдан Церн