Электронн правительств олн улст туслмж күргжәнә

Элст балһснд электронн правительств цаарандан көдлжәнә. Хотл балһсна болн танһчин райодын әмтн гертәсн һарлго цуг кергтә зәнглһ авч чаджана. Нег үлү, һаза догшн халун болснас көлтә иим туслмж олн улст кергтә болжана. Иим систем яһж көдлжәнә, улст иим туслмж кергтә аль угай?

Арвн долан наста Гернзл МВД-н әнгд ирәд, зарһин засг уга гисн справк авх саната. Иим документ деед сурһулин заведеньд орхла кергтә болна. Иим туслмжиг электронн эв-арһар авч болдгин тускар күүкн меджәсн уга бәәж. Тер мет Элст балһсна бәәрн күүкд күн Анна Марысаева бас иим бәәдлд тусв. Региональн министерствд иим документ авхар ирхлә, электронн систем яһж көдлдгин тускар энүнд тодрхаһар цәәлһж өгв.

Анна Марысаеван келсәр, иим туслжм бәәхин тускар сонсчкад, икәр өврв. Нег үлү, ода һаза догшн халун болжах кемд гертәсн кергтә цаас авч болх. Эннь сән керг.

Эн жил дотр-дундын ведомствд электронн эв-арһар тавн эрлһн орж ирв. Цааснд бичсн эрлһнә то болхла нег миннд күрв. Давсн жилд болхла дөрвн минһн иим эрлһн орж ирлә. Региональн министерствин зәнглһнә цутхлнгин ахлач Виктория Болдыреван келсәр, өдр болһн һучн эрлһн орж ирнә. Энд зарһин засгла харһулгдсн эс гиж зарһсин засг уга гисн справк, политическ цаажал харһсн улсин нер цеврдүлһнә туск документ болн талдан чигн цаас һарһж өгнә.

Хальмг танчһар МВД-н зәнглһнә цутхлнгин ахлач Виктория Болдыреван келсәр, альд бәәв чигн. тадн иим туслжм авч чадхит. Әәдрхн, Волгоград балһснд бәәв чигн иим туслмж авч болжана. Тадн альд бәәснь йилһн уга.

Государственн болн муниципальн дөчн туслмжиг, эднәс ик зунь социальн халхин туслмжиг региональн правительств электронн эв-арһар өгчәнә. Үлгүрнь, ода маши залдг иткүлин цаас авхин төлә электронн эв-арһар эрлһ орулж өгч болх. Шишлнг порталд темдглж бичгдснә хөөн тадн пароль авх зөвтәт. Энүнә хөөн цуг кергтә цаас авч болх, олн-зүсн туслжмин мөнг өгч болжана. Электронн правительствин делгрлтин төрин заллтин зәнглсәр, иим системар кергтә документиг муниципалитетмудт бас авч болх.

Хальмг танһчин электронн правительствин делгрлтин заллтин ахлачин дарук Арслан Манджиевин келсәр, ода мана танһчд дөчн туслмж авч болх. Уд луга дәкәд дөчн туслмж авдг арһ учрх. Ода Элтс балһсндл олн халхта зәнглһнә цутхлнг көдлжәнә. Долан хонгт нааран йисн зун эрлһн орж иржәнә.

Кемр тадн электронн эв-арһар танд кергтә документ эс авсн болхла, энүнә тускар эрлһ орулж өгч болжана. Государственн эс гиж муниципальн туслмж цаглань эс күцәсн иим көдләч һучн минһн арслнг ялд унх.

Ээнән Делгр, Настан Сергей