Давсн амрлһна өдрмүдт Элстин цутхлнг хурлд Бурхн Багшин әрүн шүтәнд кесг минһн улс мөргв
Эндр Бурхн Багшин әрүн шәрл танһчин райодт күрх. Дәкәд нег тодлад келхлә, эн әрүн шүтәг Хальмг танһчд Шри Ланкин орн-нутгас авч ирв. Давсн бембә өдр энүг Элст балсһна цутхлнг хурлд кесг минһн күн үзж чадв. Хальмгин цутхлнг хурлын гелнгүд мөргүл күцәв. Энүнә хөөн хойр өдр кесг әмтн әрүн шүтәг хәләж, мөргв. Бурхн Багшин әрүн шәрл ик илвтә күчн-чидлтә болна. Энүг үзсн күүнә иргч һурвн жирһл хөвтә болх гиж тоолгдна. Шри Ланка орн-нутг маднас ик холд һазрт бәәв чигн, бидн хоорндан өөрхн улс болжанавидн гиж буддийск лам Палеканде Ратанасара Маха Теро келв. Хальмг танһчин әмтн хөвтә улс бәәж. Бурхн Багшин әрүн шүтән тана танһчд үлдх. Тегәд тана һазр әрүн болн евәлтә болх гиж хол һазрас ирсн гиич темдглв.
Һарцин чилгчәр спортын туск зәнг. Элст балһснд пейнтболын өвәрц марһан болв. Б-З: Хотл балһсна мэрийн баһчудын, туризмин болн спортын комитет дүлә улсин цугәрәсән ниицәнә Хальмгин региональн әнглә хамдан иим дөрлдә бүрдәж давулв. Энүнә һол күцлнь — инвалид улсиг социальн халхар дөннлһнә керг болжана. Марһанд дөрвн команд орлцв. Энүнә ханьд баһ наста инвалид улс орлцв.
