Элст балһснд художественн гимнастикин танһчин секәтә марһан болв

Спортын туск дәкәд нег зәнг. Элст балһснд художественн гимнастикин танһчин секәтә марһан болв. Энүнд Аһш, Ставрополь, Краснодар болн Элст балһсдын зун һучн уйн наста спортсменк билг-эрдмән үзүлв. Соньн болн ке-сәәхн марһаг мана үүдәгч баг бас хәләв.

Художественн гимнастикин танһчин марһанд орлцсн көвүд-күүкд дунд тавн наста Делгр Ханджиева хамгин бичкн гимнастк болж һарв. Тер бийнь Делгр талдан күүкдәс хоцрсн уга. Эднлә әдл бичкн күүкн күнд дасхл кеж чадв. тегәд дөрлдән ашт алтн медаль шүүж авв. Делгр Ханджиеван келсәр, художественн гимнастик икәр таасгдна. Мини эк икәр байрлх гиж Делгр келнә.

Күсдундур жил хооран Делгриг экнь художественн гимнастикин секцд орулв. Ода экн ик гидгәр байрлжана. Энүнә тренер Людмила Гальченко келсәр, бичкдүд эврәннь эк-эцкнртәһән чидлән нөөлго көдләд, иим сән үзмж бәрж чадв. Бичкдүдин спортын школын художественн гимнастикин тренер Людмила Гальченко келсәр, ода болжах марһанд хамгин бичкн, тавн-нәәмн наста күүкд дөрлджәнә. Иим дөрлдән бичкдүдт йоста байр болна.

Эврәннь сурһульчнран дөннхәр ирсн тренермудын тоолврар, хамгин һол кергнь — күүкдлә седклән өгч көдлх кергтә. Хальмг танһчин художественн гимнастикин марһанд зәрм күүкд түрүн болж орлцжана. талдан күүкд болхла Әрәсән регионмудт болдг дөрлдәнд орлцад, дамшлт хоршаж чадв. Тер бийнь иим марһана йовудт күүкд диилвр бәрхәр зүткнә, дамшлтан өөдүлх арһ учрна.

Командн марһанд Ставрополин, Аһш болн Элст балһсдын уйн наста гимнасткс призермудын тоод орв. Диилвр бәрсн спортсменкс болн призермуд күндлһнә һашгудар болн үнтә мөрәһәр ачлгдв. Тер мет зәрм гимнасткс шишлнг мөрә шүүж авч чадв. Эдн цугтан мана танһчин художественн гимнастикин бичкд оддуд болжана.